Usı jıl 5-dekabr kúni Ájiniyaz atındaǵı Nókis mámleketlik pedagogikalıq institutında shólkemlestiriw máselelerine baǵıshlanǵan májilis bolıp ótti.
Májilisti Ózbekstan Respublikası Joqarı bilimlendiriw, ilim hám innovaciyalar ministri Q.Sharipov basqarıp bardı.
Ilajda sońǵı jıllarda elimizde joqarı bilimlendiriwdi sapa jaǵınan jańa basqıshqa kóteriw, zamanagóy bilim hám kónlikpelerge iye bolǵan, kreativ pikirleytuǵın, málimleme texnologiyaları hám shet tillerin tereń meńgergen kadrlardı tayarlaw baǵdarında ámelge asırılıp atırǵan reformalar, olardıń nátiyjeleri, aldaǵı wazıypalar haqqında sóz boldı.
Májiliste shólkemlestiriw máselesi kórip shıǵılıp, Ózbekstan Respublikası Ministrler Kabinetiniń tiyisli buyrıǵı tiykarında Ájiniyaz atındaǵı Nókis mámleketlik pedagogikalıq institutı rektorı lawazımına Quvondik Qadirov tayınlanǵanlıǵı atap ótildi.
Q.Qadirov usı kúnge shekem instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı, sonday-aq, institut rektorı wazıypasın waqıtsha atqarıwshısı lawazımlarında jumıs islegen.
Májiliste Ózbekstan Respublikası Joqarı bilimlendiriw, ilim hám innovaciyalar ministrliginiń buyrıǵı menen instituttıń oqıw isleri boyınsha prorektorı lawazımına tayınlanǵan Muxtar Ibragimov jámáátke tanıstırıldı.
M.Ibragimov miynet jolı dawamında Qaraqalpaq mámleketlik universitetinde oqıw isleri boyınsha prorektor lawazımında, sonday-aq, 2019-2024-jıllarda Ózbekstan Respublikası Oliy Majlisi Nızamshılıq palatasınıń deputatı – Ilim, bilimlendiriw, mádeniyat, sport hám jaslar máseleleri komitetiniń aǵzası sıpatında jumıs alıp barǵan.
Májiliste bir qatar professor-oqıtıwshılar shıǵıp sóylep, institut rektorı hám oqıw isleri boyınsha prorektorına aldaǵı jumıslarında tabıslar tiledi.
Ilajda xalıqaralıq standartlarǵa sáykes kadrlar tayarlaw, xalıqaralıq birge islesiwdiń nátiyjeliligin hám bilimlendiriwdiń sapasın arttırıw, sonday-aq, bakalavr tálim baǵdarların tiyisli tártipte xalıqaralıq akkreditaciyadan ótkeriw boyınsha aldaǵı islenetuǵın jumıslar belgilep alındı.
Májiliske Qaraqalpaqstan Respublikası Joqarǵı Keńesiniń komitet baslıǵı M.Atamuratov qatnastı.
Qaraqalpaqstan xabar agentligi