«Өзбеккосмос» агентлиги «Пүткил жер жүзилик космос ҳәптелиги» шеңберинде көплеген ири жойбарларды әмелге асырмақта. Агентликтиң басламасы менен быйылғы жылдың 4-10-октябрь күнлери мәмлекетимизде «Пүткил жер жүзилик космос ҳәптелиги» илажлары болып өтеди.
БМШ Бас Ассамблеясы тәрепинен 1999-жылы қол қойылған резолюцияға муўапық, ҳәр жылы октябрь айының дәслепки 10 күнлигинде дүньяның 100 ге шамалас мәмлекетлери усы сәнени кеңнен белгилейди.
4-10-октябрь күнлери «Ташкент City Mall» орайында космос тарийхына бағышланған арнаўлы көргизбе өз жумысын баслайды.
Қалаберди, балалар ушын комплекстеги «Sky Park» тәрепинен түрли интерактив шоу ойынлар, таңлаў ҳәм викториналар өткериледи, делинеди Санлы технологиялар министрлигиниң мағлыўматында.
Соның менен бирге, 5-6-октябрь күнлери Ташкент қаласындағы Турин Политехника университетинде «Өзбеккосмос» агентлиги ҳәм NASA менен биргеликте шөлкемлестирилип атырған ири «NASA Space Apps Challenge 2024» марафоны болып өтеди. Онда 200 ден аслам жаслар 40 қа шамалас топарларға бөлинген ҳалда өз жойбарларын ислеп шығады.
Сондай-ақ, пүткил Республика бойынша улыўма билим бериў мектеплери, академиялық лицей ҳәм университетлерде «Пүткил жер жүзилик космос ҳәптелиги» темасына бағышланған ашық сабақлар, сәўбет, презентация ҳәм басқа бир қатар жойбарлардың әмелге асырылыўы режелестирилген.
А.Рустамов, ӨзА