Бул хаққында «Шарқ тароналари» XIII халықаралық музыка фестивалы баспасөз орайында Өзбекстан Республикасы мәденият министри баспасөз хаткери Сирожиддин Ўсаровтың қатнасыўында өткерилген баспасөз әнжуманында мәлим етилди.
Атап өтилиўинше, бүгин басланған «Шығыс халықлары музыка мәденияты: глобалласыў процеслеринде дөретиўшилик үйлесиў принциплери» темасында халықаралық илимий-әмелий конференция даўамында Түркий мәденият шөлкеми – ТУРКСОЙ жанындағы түркий мәмлекетлер көркем өнер университетлери аўқамының мәжилиси болып өтти.
Онда ТУРКСОЙ шөлкеминиң бас хаткери Султан Раев, Түркия, Қазақстан, Қырғызстан, Әзербайжан, Өзбекстандағы көркем өнер бағдарындағы жоқары билимлендириў мәкемелериниң ректорлары қатнасты.
Мәжилисте аўқамға ағза жоқары билимлендириў мәкемелери арасындағы бирге ислесиўди раўажландырыў, биргеликтеги жойбарларды әмелге асырыў, илимий изертлеў жумыслары ҳәм кадрлар таярлаў және олардың маманлығын арттырыў мәселелери додаланды.
Ҳәр тәреплеме додалаўлардан соң Түркий мәмлекетлер көркем өнер университетлери аўқамының резолюциясы қабыл етилди.
Мәжилисте Юнус Ражабий атындағы Өзбек миллий музыка көркем өнер институты аўқам ағзалығына қабыл етилди ҳәм оған ағза жоқары билимлендириў мәкемелери менен өз-ара бирге ислесиў меморандумына қол қойылды.
Сондай-ақ, халықаралық конференция даўамында Қытай, Франция, Россия, Германия, Гамбия, Оман ҳәм Иордания мәмлекетлериндеги жоқары оқыў орынлары, халықаралық илимий-изертлеў орайларының жетекшилери арасында өз-ара бирге ислесиў шәртнамалары дүзилди.
Бул шәртнамаларда биргеликтеги дөретиўшилик жойбарлар, гастроль сапарлары, халықаралық фестивальлар, симпозиумлар, таңлаўлар ҳәм жазғы (қысқы) мектеплер шөлкемлестириў, ҳәр еки тәреп жетекши профессор – оқытыўшылары тәрепинен шеберлик сабақларын өткериў, теориялық пәнлерден лекциялар оқыў, илимий-теориялық конференция ҳәм симпозиумлар, илимий семинарлар, дөгерек сәўбетлери ҳәм ушырасыўларда қатнасыў, илимий-методикалық баспалар алмасыўы және институт профессор-оқытыўшыларының маманлығын арттырыўға жәрдем бериў бойынша бирге ислесиў қатнасықларын орнатыў нәзерде тутылған.
Ғ.Хасанов, А. Исроилов (сүўрет), ӨзАның хабаршылары