Жоқары билимлендириў, илим ҳәм инновациялар министри Қоңыратбай Шарипов Германия Федеративлик Республикасының Өзбекстан Республикасындағы жаңадан тайынланған Айрықша ҳәм толық ҳуқықлы елшиси Манфред Хутерер менен ушырасты.

Тәреплер арасында инженер-техника қәнигелерин таярлаўда өз-ара билимлендириў бағдарламаларын енгизиў, Германия Федеративлик Республикасынан тәжирийбели илимпазларды Өзбекстанға мирәт етиў, әҳмийетли глобал машқалалар шешимине қаратылған өз-ара илимий изертлеў жумысларын әмелге асырыў сыяқлы мәселелер додаланды.

– Мен ушын мәмлекетиңизде елши болып хызмет етиў үлкен мақтаныш,-деди Манфред Хутерер. – Өзбекстанда билимлендириў, илим бағдарларында бир қатар әҳмийетли жумысларды биргеликте әмелге асыратуғынымызға исенемен.

Министр Қ.Шарипов, өз гезегинде Манфред Хутерерди жаңа лаўазымы менен қутлықлап, биргеликтеги тийкарғы ўазыйпаларға айрықша тоқтап өтти.

– Германия бәрқулла биз ушын әҳмийетли шерик болып келген,-деди министр. – Ҳәзирги күнде өз-ара студентлер, профессор-оқытыўшылар алмасыўы бағдарламаларын кеңейтиў, жас илимпазлардың Германияда илимий стажировкаларын шөлкемлестириў әҳмийетли бағдарлардан бири. Сондай-ақ, Германия тәрепи менен Өзбекстан Республикасында биринши немис университетин шөлкемлестириў бойынша сөйлесиўлерди даўам еттириўге таяр екенлигимизди мәлим етемен.

Муҳайё Тошқораева,

ӨзА