Өзбекстан Республикасы Президенти Шавкат Мирзиёев 5-май күни Тәжикстан Республикасы Президенти Эмомали Раҳмон менен телефон арқалы сөйлести.
Тәжикстан жетекшиси мәмлекетимиз басшысын Өзбекстан Республикасы Конституциясына өзгерислер ҳәм қосымшалар киргизиў бойынша улыўма халықлық референдумның табыслы өткерилгени менен қызғын қутлықлады.
Сөйлесиўде жоқары дәрежеде ерисилген келисимлерди әмелге асырыў мәселелерине айрықша итибар қаратылды.
Өзбекстан – Тәжикстан стратегиялық шериклик ҳәм аўқамласлық қатнасықлары избе-из беккемленип, саўда-экономикалық бирге ислесиўдиң пәти артып баратырғаны айрықша қанаатланыўшылық пенен атап өтилди.
Өз-ара саўда көлеми, биргеликтеги жойбар ҳәм кәрханалар саны артпақта. Шегара алды саўда-логистика зонасы қурылмақта. Жедел мәдений-гуманитарлық алмасыўлар даўам етпекте – март айында Душанбе қаласында еки мәмлекеттиң жетекши жоқары билимлендириў мәкемелери ректорларының биринши форумы нәтийжели өтти.
Өзбекстан ҳәм Тәжикстан Президентлери ҳәзирги кооперациялық жойбарларды жеделлестириў ҳәм әмелий бирге ислесиўдиң жаңа бағдарларын ислеп шығыў ушын Ҳүкиметлер аралық комиссияның гезектеги мәжилиси ҳәм екинши Аймақлар форумы күн тәртибин пуқта таярлаў әҳитийетли екенин атап өтти.
Регионаллық бирге ислесиў, соның ишинде, Орайлық Азия мәмлекет басшыларының бесинши Мәсләҳәт ушырасыўына таярлық көриў мәселелери бойынша пикир алысылды.
Болажақ илажлар режеси де көрип шығылды.
ӨзА