Jaslardı hár tárepleme qollap-quwatlaw, olardıń huqıqları menen nızamlı máplerin qorǵaw, sonday-aq, sociallıq-ruwxıy ortalıqtı bunnan bılay da bekkemlew maqsetinde Xojeli rayonı hákimliginde gezektegi “Basshı hám jaslar ushırasıwı” shólkemlestirildi.

Ilaj sheńberinde Ózbekstan Respublikası Ósimlikler karantini hám qorǵaw agentliginiń direktorı I.Ergashev atalıqqa alınǵan jaslar menen ashıqtan-ashıq sóylesiw ótkerdi. Ushırasıwǵa Qaraqalpaqstan Respublikası Ministrler Keńesi Baslıǵınıń orınbasarı Sh.Teshaev, Xojeli rayonı hákimi J.Ermashev hám basqa da juwapker shólkemler qatnastı.
Usı waqıtqa shekem ótkerilgen úyreniwlerge tiykarlanıp ilajda 17 jasqa ámeliy járdem kórsetildi. Atap aytqanda, olardıń besewine motokultivator, jáne besewine noutbuk, úshewine tigiwshilik úskeneleri, jáne úshewine kepserlew hám ustaxana úskeneleri, birewine suw nasosı tapsırıldı.
Ilaj dawamında shıǵıp sóylegen basshılar jaslardı zamanagóy bilim hám kásip-ónerge iye bolıw, shet tillerin úyreniw, umtılıwshań hám pidayı bolıwǵa shaqırdı. Óz gezeginde, jaslar da bildirilip atırǵan isenim hám kórsetilip atırǵan itibarǵa múnásip juwap qaytarıp, elimizdiń rawajlanıwı jolında miynet etiwge tayar ekenligin atap ótti.
Maǵlıwmat ushın, bul baslama Prezident Sh.Mirziyoevtiń 2025-jıl 14-fevral kúni jaslar menen ótkerilgen videoselektor májilisinde belgilengen wazıypalardıń orınlanıwın támiyinlew, sonday-aq, Ministrler Kabinetiniń tiyisli tapsırmalarına muwapıq ámelge asırılmaqta.
Respublikalıq komissiya tárepinen qabıl etilgen qararǵa tiykarlanıp, Ósimlikler karantini hám qorǵaw agentliginiń direktorı I.Ergashevqa Xojeli rayonındaǵı “Ámiwdárya,” “Qumjıqqın,” “Kún nurı” hám “Samankól” máhállelerinen awır kategoriyadaǵı 67 jas biriktirilgen.
Házirgi waqıtta usı jaslar arasında mánzilli, sistemalı hám nátiyjelilikke baǵdarlanǵan jumıslar nátiyjeli dawam etpekte.

Á.Jiyemuratov,
Qaraqalpaqstan xabar agentligi.