7-sentyabr` ku`ni Qaraqalpaqstan Respublikası  I.V.Savitskiy atındag`ı Ma`mleketlik ko`rkem o`ner muzeyinde Qaraqalpaqstan xalıq xudojnigi B.Serekeevtın`  75 jıllıq yubileyine arnalg`an  «Watandı jırlap» atamasındag`ı jeke ko`rgizbesi o`tkeriliwi rejejestirilmekte.

Ilaj dawamında qatnasıwshılar xudojniktin` «Bag`da», «Eslew», «Sazende», «Qızlar u`yge kir» ha`m basqa da kompozitsilarındag`ı peyzaj, portret, natyurmort janrlarındag`ı jemisli miynetlerin tamashalawı mu`mkin.

Bunnan basqa da xudojniktin` u`lkemizdin` go`zzal ta`biyatın, ken` dala, jaynag`an gu`lleri menen ırg`atılg`an tereklerin u`ylesimli ren`lerde sheberlik penen sa`wlelendiredi. Sonday-aq, onın` a`piwayı turmıs ta`rizin xalıq a`meliy ko`rkem o`neri arqalı sa`wlelendirgen «A`ke menen perzent», «Xudojnik shan`arag`ı», «Baxıt qusı», «Saxradag`ı o`mir» do`retpeleri menen jaqınnan tanısıwın`ızg`a boladı. B.Serekeevtın` do`retiwshiliginin` keyingi jıllarında suw qabaqqa su`wret salıw o`neri menen shug`ıllang`anının` da gu`wası bolasız.

Qullası, «mın` ma`rte esitkennen, bir ma`rte ko`rgen abzal» degenindey ko`rgizbeni barıp tamashalawg`a mira`t etemiz.

Ta`rbiya SEYTNAZAROVA,

 Qaraqalpaqstan xabar agentligi xabarshısı