TEATRDA TANÍLǴAN TALANT

Qaraqalpaqstan televideniesindegi balalarǵa arnalǵan «Ertekler eline sayaxat», «Túlkishek» kórsetiwleri arqalı kishkene balalardıń súyikli insanına aylanıp úlgergen Murat Begimovtı xalqımız jaqsı tanıydı.

Ol óziniń 40 jıldan aslam ómirin kórkem óner tarawına baǵıshladı.

Biz 27-mart «Xalıqaralıq teatrlar kúni» bayramı aldınan ustaz aktyor hám rejissyor menen ushırasıp, teatr haqqındaǵı pikirleri menen ortaqlastıq.


-Teatrdı men aynaǵa megzetemen. Ayna arqalı adam tek jaqsılıqtı, ana-Watanǵa, ata-anaǵa muhabbattı, durıs joldı kórse boladı. 40 jıldan aslamıraq waqıt dawamında 3 teatrda islep, ol jerdiń nanın jep, duzın tatqanman. Ásirese, quwırshaq penen islesiw kútá quramalı. Birinshi óziń oynaysań, keyin quwırshaqtı da oynatasań. Balalar dramaturgiyasında olardıń xarakterin túsiniw kerek. Olardıń kózi, tili menen jazıw kerek. Olar monologtı onsha unatpaydı, háreketti jaqsı kóredi. Spektakldi abaylı bolıp jazıw kerek, sebebi, olardıń kewline tiyetuǵın sózlerdi paydalanbaw zárúr. Ásirese, mayıplıǵı bolǵan balalardı esapqa alasań. Ishinde keltirilgen hár bir kemsitiliw olar ushın masqaralaw bolıwı múmkin, – deydi Murat Begimov.


Murat Begimov 30 jılǵa shamalas waqıt dawamında Qaraqalpaq mámleketlik jas tamashagóyler tatrında jemisli miynet etip kelmekte.

Mine, usı waqıt aralıǵında ol 30dan aslam spektakldiń avtorı bolǵan bolsa, 70ten aslam spektakllerdi saxnalastırdı. Atap aytqanda, «Sum eshek», «Sadıq doslar», «Atamnan qalǵan miyras», «Altın biyday», «Shopan bala», «Bódene hám túlki» h.t. basqalar.

Búgingi kúnde Qaraqalpaq mámleketlik jas tamashagóyler teatrında onıń «Qorqa-qorqa batır bolarsań», «Doslıq qádiri», «Túlki, tasbaqa hám taskene» spektaklleri saxnalastırılǵan bolsa, onıń avtorlıǵındaǵı «Shapan ápsanası» spektaklin saxnalastırıw jumıslarına tayarlıq kórilmekte.


27-mart «Xalaqaralıq teatrlar kúni» múnásibeti menen Shımbay rayonlıq xalıq teatrında M.Begimovtıń «Írǵalısqan adam» spektakli qoyılıwı rejelestirilmekte.

-Ustazlarım Quwatbay Ábdireymov, Reyimbay Tóreniyazov, Nájimatdin Ańsatbaevlardan kóp nárselerdi úyrendim. Búgingi kúnde ózim de ustaz dárejesine jetip qalıppan. Qoblan Qálillaev, Paraxat Kulimov, Shıńǵıs Allambergenov sıyaqlı jas talantlılar jetilisip shıqpaqta.

Tárbiya SEYTNAZAROVA,

Qaraqalpaqstan xabar agentligi xabarshısı

  28.04.2018, 15:27  |    91 ma'rte ko'rildi

Raxmet

Sayt administratsiaysi qa'te tekst haqqinda xabarlandirildi