Elimizde limon nállerin jetistiriw hám ıssıxana xojalıqların jedel rawajlandırıw, tarawdıń eksport potencialın bunnan bılay da bekkemlew, xalıqtıń bántligin támiyinlew hám dáramatın arttırıw baǵdarında keń kólemli ilajlar ámelge asırılmaqta.
Bunda Ózbekstan Respublikası Prezidentiniń usı jıl 6-marttaǵı «Ózbekstan Respublikasında limonshılıq tarawın bunnan bılay da rawajlandırıw ilajları haqqında»ǵı qararı ayrıqsha áhmiyetke iye boldı. Limon nállerin jetistiriwdi bunnan bılay da rawajlandırıw, eksport kólemin arttırıw maqsetinde «Limon jetistiriwshiler hám eksport etiwshiler» associaciyasın shólkemlestiriw rejelestirilmekte.
Joqarıdaǵı qarar menen 2018-2021-jıllarda limon atızların kóbeytiw hám jetistiriw, onı eksportqa etiwdiń ulıwma boljaw kórsetkishleri tastıyıqlandı. Usıǵan muwapıq respublikamızda 2018-2021-jıllarda 33 gektar limon atızların payda etiw, sonnan 1850 tonna ónim jetistiriw rejelestirildmekte.
Usı qarardıń mazmun-mánisin keńnen túsindiriw, limon nállerin jetistiriw hám ıssıxana xojalıqların shólkemlestiriw boyınsha Buxara wálayatında oqıw-seminar bolıp ótti. Onda Buxara, Nawayı, Xorezm wálayatlarınan hám Qaraqalpaqstannan toǵay xojalıqları, fermer, diyqan xojalıqları hám qıytaq jer iyeleri keńesleriniń, akademik M.Mirzaev atındaǵı baǵshılıq, júzimshilik hám vinoshılıq ilim-izertlew institutı Qaraqalpaqstan bóliminiń juwaplı xızmetkerleri, fermer xojalıqların baslıqları menen qıytaq jer iyeleri qatnastı.
Ilajda akademik M.Mirzaev atındaǵı baǵshılıq, júzimshilik hám vinoshılıq ilim-izertlew institutı, Tashkent mámleketlik agrar universitetiniń ilimpazları tárepinen limon nállerin resursúnemlewshi usılda jetistiriw hám kóbeytiw texnologiyasın engiziw, limonda ushırasatuǵın kesellikler hám zıyankeslerge qarsı gúresiw ilajları boyınsha keń túrde túsinik berildi.
Qaraqalpaqstan xabar agentligi.