«Ózbekstan Respublikasınıń ayrım nızam hújjetlerine ózgeris hám qosımshalar kirgiziw haqqında»ǵı Nızam tiykarında «Jurnalistlik xızmetti qorǵaw haqqında»ǵı Nızamnıń 9 statyasına ózgeris hám qosımshalar kirgizildi. Nızam 7-1-statya menen tolıqtırıldı. Sonday-aq, 16-statyada kórsetilgen normalar nızamnıń 2-statyasına kóshirilgeni sebepli alıp taslandı. Bul haqqında «Inson va qonun» saytı xabar bermekte.
Nızamda jurnalist atamasına anıqlıq kirgizildi. Zamanagóy professional jurnalistlik xızmetti alıp barıw ámeliyatın úyreniw nátiyjesinde belgili bir tema dógereginde málimleme tayarlaw procesinde málimlemeni izlew, toplaw, analizlew, redaktorlaw, tayarlaw hám tarqatıw jurnalistlik xızmettiń tiykarǵı bólegi ekenligi belgili boldı.
Sonday-aq, sırt ellerdegi nızamshılıqtı úyreniw nátiyjesinde jurnalist óziniń kásiplik xızmetin ámelge asırıwda tek ǵana málimlemeni toplaw, analizlew, tarqatıw menen emes, al sonıń menen birge, belgili bir tema dógereginde redaktorlaw hám tayarlaw menen de shuǵıllanadı.
Biraq, nızamnıń ámeldegi redakciyasında málimlemeni redaktorlaw hám tayarlaw sıyaqlı funkciyalar kórsetilmegen edi.
Kirgizilgen ózgeriske muwapıq:
«Jurnalist – miynetke baylanıslı yamasa basqa shártnamalıq qatnasıqlar tiykarında ǵalaba xabar quralları ushın xabarlar hám materiallardı toplaw, analizlew, redaktorlaw, tayarlaw hám tarqatıw menen baylanıslı bolǵan jumıs penen shuǵıllanatuǵın shaxs» bolıp tabıladı.
Islam Matekov,
Qaraqalpaqstan xabar agentliginiń sholıwshısı.