Prezident Shavkat Mirziyoev 13-aprel kúni Sırdárya wálayatı belsendileri menen ótkergen májiliste wálayatlarǵa sapar etiwler aldınan sociallıq taraw xızmetkerleriniń abadanlastırıw jumıslarına qatnastırılıp atırǵanı, ayırım orınlarda kózboyawshılıqqa jol qoyılıp atırǵanlıǵın qatań sınǵa alǵan edi.
Ózbekstan Respublikası Prezidenti Baspasóz xızmeti janındaǵı Press-xollda usı máselege baǵıshlanǵan brifing ótkerildi. Onda Prezident Baspasóz xatkeri Komil Allamjonov mámleketimiz basshısınıń sın kózqarasınan keyin kórilip atırǵan ilajlar haqqında maǵlıwmat berdi.
— Prezident bunday jaǵdaylar jáne qaytalanbawı ushın huqıqıy mexanizm jaratıw boyınsha tapsırmalar berdi. Tapsırmaǵa bola, xalıqtı, ásirese, densawlıqtı saqlaw hám bilimlendiriw tarawı xızmetkerlerin, studentlerdi abadanlastırıw jumıslarına tartıwdı qatań qadaǵan etiw boyınsha Ózbekstan Respublikası Ministrler Kabinetiniń qararı islep shıǵıladı, – deydi K.Allamjonov. – Bul qararda orınlarda abadanlastırıw xızmetleriniń jumısın keńeytiw, olardıń materiallıq-texnikalıq bazasın bekkemlew boyınsha ilajlar óz kórinisin tabadı. Onda shet mámleketlerdiń tájiriybeleri de inabatqa alınadı.
Birifingte puqaralardı jámiyetlik jumıslarǵa májbúrlew jaǵdayları jáne baqlansa, Prezidentimizdiń atap ótkenindey, jazanıń qatań bolatuǵını, sonıń ishinde, jınayıy juwapkershilikke shekemgi bolǵan ilajlar kóriletuǵını málim etildi.
Ayrıqsha atap ótilgenindey, Prezident usınday jaǵdaylardıń aldın alıw maqsetinde Bas prokuraturanıń aldına da bir qatar wazıypalar qoyǵan. Samarqandlı oqıtıwshı Diana Enikeevanıń ólimine sebepshi bolǵan lawazımlı shaxslardı yuridikalıq juwapkershilikke tartıw boyınsha tapsırmalar bergen. Házirgi waqıtta bul waqıyanıń sebepleri úyrenilmekte.
Sırdárya wálayatı belsendileri menen bolıp ótken májiliste Shavkat Mirziyoev orınlardaǵı kózboyawshılıq jaǵdaylarınan da narazı ekenligin bildirgen edi. Usınnan kelip shıǵıp, kózabaǵa jumıslar boyınsha prokurorlıq tekseriw ótkeriw boyınsha kórsetpe berilgen. Mámleketimiz basshısı jáne usınday kózboyawshılıq jaǵdaylarına jol qoymaw maqsetinde turaqlı hám qatań qadaǵalaw ornatıw zárúrligin atap ótti. Keleshekte kozboyawshılıqqa urınǵan yamasa onıń aldın almaǵan basshılar qatań jazalanadı.
Brifingte Prezidentimiz bergen tapsırmalardıń orınlanıwı, ayıpkerlerdiń jazalanǵanlıǵı haqqında ǵalaba xabar quralları, sonıń ishinde, Bas prokuratura janındaǵı media-orayı arqalı maǵlıwmatlar berip barılatuǵını atap ótildi.
Ulıǵbek ASROROV,
ÓzA nıń xabarshısı