Qaraqalpaqstan Respublikası Ishki isler ministrligi Órt qáwipsizligi basqarması xızmet hám kásiplikti tayarlıqtı shólkemlestiriw bóliminiń injeneri, leytenant Sultanbek Táńirbergenov órt qáwpinen eskertip turatuǵın qurılma oylap taptı.
Bul qurılmanıń tiykarǵı wazıypası – puqaralardı órtten eskertip turadı. Bul ásbaptıń jumıs islew tártibi háreket bolǵan waqıtta iske qosılıp, puqaralarǵa eskertiw bere baslaydı. Yaǵnıy, puqaralarda órt qáwipsizligine bolǵan refleksti payda etedi.
Ásbap 5 bólimnen ibarat bolıp, háreketti seziwshi datchik, dawıslı signaldı jetkerip beriwshi mikrofon, dawıslı signaldı jazıwshı chip, elektr quwatlılıǵın jetkerip beriwshi batareyalar, sırtqı ortalıqtan qorǵap turıwshı korpustan ibarat.
Bul qurılma kóp qabatlı jaylardıń podezdlerine ornatılıp, ol puqaralardı úylerinen asıǵıp shıǵıp baratırǵanda «Húrmetli puqaralar, úyińizdegi gaz hám elektr qurılmaların óshiriwdi umıtpadıńız ba hám órt qáwipsizligi qaǵıydalarına ámel etiń» degen mazmundaǵı eskertiwshi dawıslı signallar menen xabarlandırıp turadı.
-Leytenant Sultanbek Tańirbergenov izleniwsheń, talapshań jaslarımızdıń biri. Ol órtke qarsı profilaktikalıq jumıslardı alıp barıw maqsetinde háreketti seziwshi, órtten xabarlawshı yaǵnıy puqaralardı eskertiwshi qurılmanı oylap taptı hám de innovaciyalıq ideyasın ámeliyatta sınap kórmekte,- deydi Órt basqarması baslıǵı, mayor Azamat Dáwletov. Ol burın órt óshiriw dástegin islep shıqqan edi. Sonday-aq, ol órt qáwipsizligi xızmetinde usınday órt óshiriw jeńlerin qolaylı hám sapalı jıynaytuǵın qayta orawshı úskene islep shıqtı. Bul ásbap búgingi zaman talaplarına sáykes keletuǵın úgit-násiyat profilaktikasınıń taza túri bolıp esaplanadı.
Tárbiya SEYTNAZAROVA,
Qaraqalpaqstan xabar agentligi xabarshısı