ÓzAda Samarqand wálayatınıń Urgut rayonındaǵı sıyqırlı bulaq haqqındaǵı maqala keń jámiyetshilik arasında hár qıylı pikir–talaslardı, qızıǵıwshılıqlardı payda etpekte. Xabar.uz saytında usı bulaqtıń sırı haqqında material járiyalandı.
Samarqand wálayatınıń Urgut rayonındaǵı Chor Chinor zıyarat ornında jıl dawamında suwı qurımaytuǵın qaynar bulaq bar. Suwınıń temperaturası 17-18 gradus ıssı, bul suwdı toyıp ishseńiz de tamaǵıńız awırmaydı. Eń baslısı ol kóplegen keselliklerge – zob, asqazan keselliklerin emlew hám ishki aǵzalardaǵı taslardı maydalaytuǵınlıǵı dálillengen eken. Bul suwdan turaqlı túrde paydalanılsa betke sepkil túspeydi eken. Hátteki, 1936-jılı tarqalǵan oba epidemiyası waqtında usı suwdan ishkenlerge zıyan jetpegen.
Qaynar bulaq diametri 50-60 metr, tereńligi 40 metr bolǵan háwizden shıǵadı. Jaqsılap názer awdarsańız suw háwizdiń hár qıylı jerlerinen qaynap shıǵıp atırǵanın kóresiz. Qaynap shıǵıp atırǵan jerde bazıda hawa sharlarınıń payda bolıwı adamdı hayran qaldıradı.
Xosh, suwdıń ishine hawa qalay kirip qalǵan? Bul jumbaqtıń óz juwabı bar.
Maǵlıwmatlarǵa qaraǵanda, bul suw Urgut tawınıń joqarı tárepinde payda bolıp, jer astı jolları arqalı Chor chinor zıyarat ornınan shıǵadı eken. Bulaqtıń suwı jıldıń bazı máwsimlerinde kóbeyip, bazılarında kemeyip qaladı. Ol kemeygen waqıtta jer astı boslıqlarında hawa toplanıp qaladı. Suw kóbeygende bolsa hawa suw menen jerdiń betine usınday hawa sharların payda etip shıǵadı.
Eń qızıqlı tárepi, tesik tastıń ishinen aǵıp shıǵıp turǵan suwda nur ishindegi Kaabanıń kóriniwi bolmaqta. Bul kórinis qaynar bulaqqa kelip atırǵan turistlerdi oǵada qızıqtırmaqta. Jergilikli xalıq bul ájayıbat tesik tasqa tek ǵana tuwrıdan qaraǵanda kórinetuǵınlıǵın, oǵan saatlap qaralsa kózdiń nurı tınıqlasatuǵınlıǵın aytpaqta, – dep jazılǵan materialda.
Qaraqalpaqstan xabar agentligi