Awır sociallıq jaǵdayǵa túsip qalǵan hayal-qızlarǵa, mayıplıǵı bolǵan, kem támiyinlengen, perzentlerin tolıqsız tárbiyalap atırǵan hám turaq jay sharayatın jaqsılawǵa mútáj analarǵa arzanlastırılǵan turaq jaylar beriw tártibi haqqındaǵı rejeni tastıyıqlaw haqqında Ózbekstan Respublikası Ministrler Kabinetiniń qararı qabıl etildi. Bul haqqında Ádillik ministrliginiń «Huquqiy axborot» kanalında málim etildi.
Qarar tiykarında turaq jayǵa mútáj hayal-qızlar ushın beriletuǵın arzan turaq jaylar tóleminiń:
– 25 procenti Hayal-qızlardı hám shańaraqtı qollap-quwatlaw jámiyetlik qorı, talapker islep atırǵan shólkem hám nızam hújjetlerinde qadaǵan etilmegen basqa dáreklerdiń esabınan (baslanǵısh tólem sıpatında);
– 75 procenti ipoteka tiykarında kommerciyalıq banklerdiń jeńillikli kreditleri esabınan qarjılandırıladı.
Turaq jayǵa mútáj bolǵan hayal-qızlar ushın ajıratılatuǵın jeńillikli kreditlerdi sóndiriw:
– talapkerdiń óz qarjıları hám nızam hújjetlerinde qadaǵan etilmegen basqa dárekler;
– talapker kem támiyinlengen, turaqlı dáramatqa iye bolmaǵan hám kreditti qaplawǵa múmkinshiligi jeterli bolmaǵan jaǵdayda ol jumıs islep atırǵan shólkem, Ózbekstan Kásiplik awqamları Federaciyası Keńesi, «Máhálle» qayırqomlıq qorınıń qarjıları hám nızam hújjetlerinde qadaǵan etilmegen basqa dárekler esabınan ámelge asırıladı.
Qaraqalpaqstan xabar agentligi