Qaraqalpaqstan Respublikası kásiplik awqamları shólkemleri birlespesi Keńesinde miynetti qorǵaw hám qáwipsizlik boyınsha jámiyetlik qadaǵalawdı shólkemlestiriw boyınsha respublikalıq tańlawdıń «Eń jaqsı kárxana», «Eń jaqsı kásiplik awqam komiteti», «Miynetti qorǵaw boyınsha eń jaqsı wákil», «Miynetti qorǵaw boyınsha jas qánige» nominaciyalarında Qaraqalpaqstan Respublikası basqıshınıń jeńimpazların sıylıqlaw saltanatı bolıp ótti.
Tańlawdıń birinshi basqıshı boyınsha dúzilgen komissiyanıń sheshimi menen eń jaqsılar anıqlanıp, jeńimpaz dep tabıldı. Atap aytqanda, Agrosanaat kompleksi xızmetkerleri kásiplik awqamı tarawında «Eń jaqsı kárxana» nominaciyası boyınsha «Xalqabad paxta tazalaw» akcionerlik jámiyeti, Densawlıqtı saqlaw xızmetkerleri kásiplik awqamı tarawında «Eń jaqsı kárxana» nominaciyası boyınsha Ellikqala rayonlıq medicina birlespesi, «Miynetti qorǵaw boyınsha eń jaqsı wákil» nominaciyası boyınsha Qaraózek rayonlıq medicina birlespesi «Miynetti qorǵaw boyınsha jas qánige» nominaciyası boyınsha Nókis qalalıq medicina birlespesinen Bahadır Darxanov, Tutınıw tovarların óndiriw, sawda hám xızmet kórsetiw shólkemleri xızmetkerleri kásiplik awqamı tarawında «Eń jaqsı kárxana» nominaciyası boyınsha «Amudáryateks» JShJ, Mámleketlik mákemeler hám jámiyetlik xızmet kórsetiw xızmetkerleri kásiplik awqamı tarawında «Eń jaqsı kárxana» nominaciyası boyınsha Qorǵanıwǵa kómeklesiwshi «Vatanparvar» shólkeminiń Nókis avtomobil mektebi, «Miynetti qorǵaw boyınsha eń jaqsı wákil» nominaciyası boyınsha Qaraqalpaqstan Respublikası Ayrıqsha jaǵdaylar basqarması, Transport, jol hám kapital qurılıs, qurılıs industriyası xızmetkerleri kásiplik awqamı tarawında «Eń jaqsı kárxana» nominaciyası boyınsha «Qaraqalpaqstan Respublikası jollardan turaqlı paydalanıw» unitar kárxanası, Neft-gaz hám geologiya xızmetkerleri kásiplik awqamı tarawında nominaciyası boyınsha «Taqıyatas neft bazası» JShJ, Ximiya sanaatı xızmetkerleri kásiplik awqamı tarawında «Eń jaqsı kárxana», «Eń jaqsı kásiplik awqam komiteti» nominaciyaları boyınsha «Qońırat soda zavodı» unitar kárxanası, Energetika tarawı xızmetkerleri kásiplik awqamı tarawında «Eń jaqsı kárxana», «Eń jaqsı kásiplik awqam komiteti» nominaciyaları boyınsha «Taqıyatas jıllılıq elektr stanciyası» akcionerlik jámiyeti jeńimpaz boldı.
-Tańlawdı ótkeriwdegi maqset, xızmetkerlerge salamat hám qáwipsiz miynet sharayatın jaratıw, óndiristegi baxıtsız hádiyseler menen kásip kesellikleriniń aldın alıw, sonday-aq, miynetti qorǵaw hám qáwipsizlik haqqındaǵı nızam hújjetleri ústinen jámiyetlik qadaǵalawdı támiyinlewde kásiplik awqamları jumıslarınıń nátiyjeliligin arttırıwdan ibarat,-deydi Qaraqalpaqstan Respublikası kásiplik awqamları shólkemleri birlespesi Keńesiniń bólim meńgeriwshisi Bekpolat Utepbergenov.-Bul iygilikli iske jaslardı keńirek tartıw maqsetinde bıyılǵı jılı tańlawǵa jańadan «Miynetti qorǵaw boyınsha jas qánige» nominaciyası kirgizildi.
Tańlawdıń Qaraqalpaqstan Respublikası basqıshınıń jeńimpazlarına shólkemlestiriwshiler tárepinen Diplom jáne bahalı sawǵalar tapsırıldı.
Miynetti qorǵaw hám qáwipsizlikti támiyinlewde jámiyetshilik qadaǵalawdı shólkemlestiriw boyınsha respublikalıq tańlawdıń kelesi basqıshınıń jeńimpazları 28-aprel-Pútkil dúnyajúzilik miynetti qorǵaw kúni anıqlanadı.
D.ABIBULLAEV,
Qaraqalpaqstan xabar agentliginiń xabarshısı.