Ózbekstan Respublikası Oliy Majlisi Nızamshılıq palatasınıń 2018-jıl 12-aprel kúni ótkerilgen májilisinde deputatlar bir qatar nızam joybarların kórip shıqtı.
Burın xabar etilgenindey, kún tártibine kirgizilgen nızam joybarları dáslep siyasiy partiyalar frakciyalarınıń, Ózbekstan Ekologiyalıq háreketi deputatlıq toparınıń, komitetler hám olardıń janında jumıs islep atırǵan ekspert toparlarınıń májilislerinde dodalanǵan edi.
Nızam joybarları 2017-2021-jıllarda Ózbekstan Respublikasın rawajlandırıwdıń bes tiykarǵı baǵdarı boyınsha Háreketler strategiyasında áhmiyetli wazıypalar sıpatında belgilengen reformalardıń huqıqıy tiykarların jetilistiriwge, nızam ústinligin támiyinlewge, jámiyetlik hám mámleketlik turmıstıń barlıq tarawların reformalawǵa qaratılǵan.
Solay etip, deputatlar óz jumısların texnikalıq reglamentlerge ámel etiw ústinen nátiyjeli mámleketlik qadaǵalawdı, ónimdi májbúriy sertifikatlastırıw qaǵıydaları sertifikatlastırıw uyımları hám akkreditaciyalanǵan sınaw laboratoriyaları tárepinen buzılmawı ushın olardıń juwapkershiligin arttırıw maqsetinde islep shıǵılǵan «Ózbekstan Respublikasınıń Hákimshilik juwapkershilik haqqındaǵı kodeksine ózgerisler hám qosımshalar kirgiziw haqqında»ǵı nızam joybarın ekinshi oqıwda dodalawdan basladı.
Nızam joybarın ekinshi oqıwǵa tayarlaw procesinde siyasiy partiyalar frakciyaları hám Ózbekstan Ekologiyalıq háreketi deputatlıq toparı, ministrlikler hám vedomstvolar, puqaralıq jámiyeti institutlarınıń wákilleri, ámeliyatshı qánigeler jáne ilimpazlardan ibarat jumısshı toparı qáliplestirildi.
Deputatlar usı nızamnıń qabıl etiliwi zárúrligine toqtap, ol ónimler, processler, jumıslar hám xızmetlerdiń qáwipsizligin, sapasın jáne básekige shıdamlılıǵın arttırıw máselelerinde tutınıwshılardıń hám mámlekettiń máplerin qorǵawǵa xızmet etetuǵının atap ótti. Sonıń menen birge, sertifikatlastırıw uyımları hám akkreditaciyalanǵan sınaw laboratoriyalarınıń juwapkershiligin arttırıw, sonday-aq, «Texnikalıq jaqtan tártipke salıw haqqında»ǵı hám «Ónimlerdi hám xızmetlerdi sertifikatlastırıw haqqında»ǵı nızamlardıń normaların tolıq ámelge asırıwdı támiyinleydi.
Bıyılǵı jıldıń mart ayında parlamenttiń tómengi palatasınıń gezektegi májilisnde ótkerilgen qadaǵalaw-talqılaw úyreniwleriniń juwmaqlarına bola bir topar deputatlar tárepinen tayarlanǵan «Tasıwshınıń puqaralıq juwapkershiligin májbúriy qamsızlandırıw haqqında»ǵı Ózbekstan Respublikası Nızamına ózgerisler hám qosımshalar kirgiziw haqqında»ǵı nızam joybarı birinshi oqıwda kórip shıǵılǵan.
Joybar shet ellerdiń tájiriybesin esapqa ala otırıp, islep shıǵılǵan. Atap aytqanda, Rossiya Federaciyası, Belarus, Qazaqstan, Qırǵızstan nızamshılıǵında qamsızlandırıw shártnaması bir jılǵa shekemgi múddetke dúziletuǵının, sonday-aq, hár bir transport quralına óz aldına qamsızlandırıw polisi beriletuǵının atap ótiw zárúr.
Joybardı ekinshi oqıwǵa tayarlaw dawamında parlamentiń Nızamshılıq palatası deputatlarınan, ministrlikler hám vedomstvolar, puqaralıq jámiyeti institutları wákillerinen, ámeliyatshı qánigelerden ibarat jumısshı topar dúzildi. Bunnan tısqarı, nızam joybarı deputatlardıń sociallıq tarmaqlardaǵı jeke betlerinde hár tárepleme dodalaw ushın jaylastırılǵan bolıp, ol tarmaqqa jazılıwshı saylawshılardıń pikir-usınısların esapqa alıw imkaniyatın berdi.
Nızam joybarına muwapıq jumısı licenziyalanatuǵın, transportta jolawshılardı hám olardıń múlkin kommerciyalıq tiykarda tasıw boyınsha xızmetler kórsetetuǵın yuridikalıq shaxslarǵa tasıwshınıń puqaralıq juwapkershiligin májbúriy qamsızlandırıw shártnamasın úsh aydan bir jılǵa shekemgi múddetke dúziw huqıqı berilmekte. Bul normanıń qosılıwı tasıwshılarǵa licenziyalardıń ámel etiw múddetine shekem qamsızlandırıw shártnamasın dúziw, licenziyalardı biykarlaw hám qaytadan dizimge alıw ushın artıqsha qárejet jumsawǵa jol qoymaw múmkinshiligin beredi.
Bul nızamnıń qabıl etiliwi, atap ótilgenindey, licenziyalanatuǵın transportta jolawshılardı tasıw boyınsha xızmetler kórsetetuǵın tasıwshılar ushın sharayatlar jaratadı.
Soń «Ózbekstan Respublikasınıń Bajıxana kodeksine ózgerisler hám qosımshalar kirgiziw haqqında»ǵı nızam joybarı ekinshi oqıwda dodalandı. Nızam joybarı Ózbekstan Respublikası Prezidentiniń «Sırtqı sawda jumısın bunnan bılay da erkinlestiriw hám isbilermenlik subektlerin qollap-quwatlaw ilajları haqqında»ǵı hám «Shet mámleketlerde kórgizbe ilajların ótkeriw ushın mólsherlengen tovarlardı alıp shıǵıw tártibin ápiwayılastırıw ilajları haqqında»ǵı qararlarına muwapıq islep shıǵılǵan.
Nızam joybarı menen Ózbekstan Respublikası Bajıxana kodeksiniń 32 hám 245-statyalarına tovarlar, jumıslar hám xızmetler eksportın, buǵan jańa úzilgen miywe-ovosh ónimleri kirmeydi, ámelge asırıw huqıqın, «waqtınsha alıp kiriw» bajıxana rejiminde turǵan tovarlardı reeksport etiwge mámleketlik bajıxana xızmeti uyımları tárepinen ruqsatnama beriliwi boyınsha talaptı biykarlawdı názerde tutatuǵın ózgerisler kirgizilmekte.
Dúzilgen arnawlı jumısshı topar tárepinen ekinshi oqıwǵa tayarlaw sheńberinde nızam joybarın jetilistiriw boyınsha ótkerilgen talqılaw juwmaqları usınıldı hám usı taraw ekspert-qánigeleriniń pikir-usınısları itibarǵa alındı.
Májilis dawamında parlamenttiń Nızamshılıq palatasınıń wákilliklerine tiyisli basqa da máseleler kórip shıǵıldı.
Ózbekstan Respublikası Oliy Majlisi
Nızamshılıq palatasınıń Málimleme xızmeti