Ózbekstan Respublikası Prezidenti Shavkat Mirziyoev 20-aprel kúni Rossiya Federaciyası Prezidenti Vladimir Putin menen telefon arqalı sóylesti.
Mámleketimiz basshısı Prezident Vladimir Putinge shın júrekten qutlıqlaǵanı hám kúni keshe Buxara wálayatında Qandım gazdi qayta islew kompleksiniń qurılısı juwmaqlanǵanı hám iske túsirilgeni múnásibeti menen bolıp ótken saltanatlı ilajda Rossiyadan abıroylı delegaciya qatnasqanı ushın tereń minnetdarshılıq bildirdi.
«LUKOYL» kompaniyası menen birgelikte tábiyǵıy gazdi tereń qayta islew boyınsha iske túsirilgen joqarı texnologiyalıq óndiris kompleksi ellerimiz arasında barǵan sayın bekkemlenip atırǵan strategiyalıq sheriklik hám awqamlaslıq qatnasıqlardıń jáne bir ayqın kórinisi ekeni ayrıqsha atap ótildi.
Sóylesiwde joqarı dárejedegi ushırasıwlar waqtında erisilgen kelisimler sheńberinde Ózbekstan – Rossiya kóp qırlı baylanısların bunnan bılay da rawajlandırıw hám bekkemlew máseleleri boyınsha pikir alısıldı.
Sonday-aq, regionallıq hám xalıqaralıq siyasattıń áhmiyetli máseleleri kórip shıǵıldı.
Ózbekstan Prezidenti Rossiya Prezidentine mámleketlik sapar menen elimizge keliwge jáne bir márte mirát etti. Mirát etiw qanaatlanıwshılıq penen qabıl etildi. Sapardıń anıq múddeti diplomatiyalıq kanallar arqalı kelisip alınadı.
Sóylesiwdiń sońında Ózbekstan Respublikası Prezidenti Shavkat Mirziyoev hám Rossiya Federaciyası Prezidenti Vladimir Putin hár qıylı formatlarda óz-ara baylanıslardı jedel dawam ettiriwge tayar ekenliklerin atap ótti.
ÓzA