Ellikqala rayonındaǵı aldınǵı saptıǵı fermerler haqqında sóz bolǵanda «Sarabiy» awıl puqaralar jıyını aymaǵındaǵı «Toxir uǵlı Boǵibek» fermer xojalıǵınıń baslıǵı Farxad Atadjanov húrmet penen tilge alınadı. Onıń kóp jıllıq miyneti húkimetimiz tárepinen ılayıqlı bahalanıp, ótken jılı Awıl xojalıǵı xızmetkerleri kúni bayramı qarsańında «Doslıq» ordeni menen sıylıqlandı.
Fermer xojalıǵında paxtashılıq hám ǵálleshilik penen bir qatarda pilleshilikti rawajlandırıwǵa ayrıqsha áhmiyet berilmekte. Sońǵı úsh jılda 57 qutı nawqan qurtınan 3620 kilogramm pille jetistirip, reje 120 procentke orınlandı. Qusshılıqtı rawajlandırıw maqsetinde 360 bas tawıq baǵılmaqta.
Tájiriybeli fermer jerlerdiń meliorativlik jaǵdayın jaqsılaw boyınsha aymaqtaǵı jap-salmalardı tazalaw jumısların alıp barıp, egislik maydanlardıń ónimdarlıǵın jıldan-jılǵa arttırıwǵa erispekte. Onıń jerlerdi shúdigarlaw, daqıllarǵa tárbiya beriw boyınsha aldınǵı is tájiriybesi rayon fermerleri arasında keń en jaydırılmaqta.
-Búgingi kúni húrmetli Prezidentimiz Shavkat Mirziyoev basshılıǵında awıl xojalıǵı tarawına ayrıqsha itibar qaratılıp, barlıq sharayatlar jaratılıp berilmekte,-deydi fermer Farxad Atadjanov. Bunday itibar hám ǵamqorlıqqa ózimizdiń pidákerlik miynetimiz benen juwap beriwimiz tiyis.
Bıyılǵı jılı fermer xojalıǵı aǵzaları 40 gektar maydanǵa paxta, 5 gektar maydanǵa ashshı burısh, 3 gektarǵa kartoshka egiwdi rejelestirip, tayarlıq jumısların álle qashan baslap jiberdi. Ótken jılı gúzde egilgen 21 gektar biyday maydanınan bir tegis nál alınıp, agrotexniklıq qádeler tiykarında tárbiya berilmekte. Xojalıqtıń atız sherteginiń átirapı abadanlastırılıp, bul jerde balıqshılıq, qusshılıq, pal hárreshiligin rawajlandırıw jolǵa qoyılıp, ıssıxana qurıw isleri ámelge asırılmaqta.
Qaraqalpaqstan xabar agentligi.