Nókis qalasındaǵı xızmet kórsetip atırǵan 9 shańaraqlıq hám 1 kóp tarmaqlı poliklinikalarda oraylasqan maǵlıwmatlar bazası, nawqastıń elektron ambulatoriyalıq kartalarına hám kesellik tariyxına iye bolǵan sistema jolǵa qoyılmaqta
Ózbekstan Respublikası Densawlıqtı saqlaw ministrliginiń 2017-jıl 17-avgusttaǵı «Birden-bir elektron dizimge alıw hám Internet tarmaǵı arqalı shıpaker qabıllawına jazılıw «Elektron poliklinika» avtomatlastırılǵan informaciyalıq sistemasın iske túsiriw haqqında»ǵı buyrıǵına muwapıq ámelge asırılıwı belgilengen bul sistema shańaraqlıq poliklinikalarda avtomatlastırılǵan halda dizimge alıw, birden-bir nawqastıń elektron ambulatoriyalıq medicinalıq kartasın júrgiziw, xalıqqa onlayn usılda, yaǵnıy úyinen shıqpastan jasaw ornı boyınsha shańaraqlıq poliklinika shıpakeri qabıllawına jazılıw, puqaraǵa qolaylı waqıtta biypul medicinalıq xızmetten paydalanıw imkaniyatın beredi.
– 2018-jıldıń aqırında Nókis qalasındaǵı barlıq poliklinikalarda nawqastıń elektron ambulatoriyalıq medicinalıq kartasına basqıshpa-basqısh ótiw procesiniń juwmaqlanıwı rejelestirilgen, – deydi Nókis qalalıq emlewxanası bas shıpakeriniń orınbasarı Abdurashid Yakubov. – Bul jańa innovaciyalıq sistema shıpakerlerdiń nawqastıń ambulatoriyalıq medicinalıq kartasın jazıwǵa ketetuǵın waqtın sezilerli dárejede qısqartadı. Bunnan tısqarı, «Kadrlar resursların basqarıw», «Mákemelerdiń pasport esabınıń birden-bir sisteması» avtomatlastırılǵan informaciyalıq sistemalarınıń turmısqa engiziliwi ámelge asırılmaqta. Keleshekte donorlar hám donorlıqtan shıǵarılǵan shaxslar haqqında, donorlıq qanınıń esabatı hám onıń bólistiriliwi sıyaqlı maǵlıwmatlar bazasın shólkemlestiriw, juqpalı keselliklerdiń epidemiologiyalıq monitoringi, psixonevrologiyalıq hám narkologiyalıq dispanserlerden «Maǵlıwmatnama alıw ushın elektron arza beriw» avtomatlastırılǵan informaciyalıq sistemaların ámelge asırıw rejelestirilgen.
– Poliklinikamızǵa qaraslı 13 aymaqta jasawshı 22 mıń 744 puqaralardıń barlıǵı avtomatlastırılǵan halda dizimge alınıp, olardıń tolıq maǵlıwmatları oraylasqan maǵlıwmatlar bazamızǵa kirgizildi, – deydi Nókis qalalıq 9-sanlı shańaraq poliklinikası bas shıpakeriniń orınbasarı Raya Dáwletova. – Usı aymaqlarǵa bólistirilgen 13 ulıwma ámeliyat shıpakeri bazaǵa jalǵanǵan kompyuterler menen támiyinlendi. Olardıń járdeminde shıpaker nawqastıń ambulatoriyalıq medicinalıq kartasız-aq aldına kelgen nawqaslar haqqında xabardar bolıp otıradı. Sonday-aq, shıpakerdiń aldında náwbet kútip otırıwǵa shek qoyıldı. Sebebi, elektron tárizde shıpaker qabıllawına jazılıw arqalı nawqas shıpakerge kórinetuǵın waqtın bilip aladı. Poliklinikanıń foyesinde ornatılǵan monitor hár bir shıpakerdiń kabinetiniń nomerin, onıń qabıllaw waqtın, neshe nawqas qabıllawǵa jazılǵanı sıyaqlı maǵlıwmatlardı kórsetip turadı.
Birden-bir elektron dizimge alıw hám Internet tarmaǵı arqalı shıpaker qabıllawına jazılıw «Elektron poliklinika» avtomatlastırılǵan informaciyalıq sisteması rayonlarda da basqıshpa-basqısh jolǵa qoyıladı. 2020-jılǵa barıp «Elektron densawlıqtı saqlaw» sisteması tolıq jolǵa qoyılıp, elimizde medicinalıq xızmet kórsetiw sapası zamanagóy talaplar dárejesine alıp shıǵıladı.
M.PIRNAZAROVA,
Qaraqalpaqstan xabar agentliginiń xabarshısı