Elimiz boylap Nawrız bayramı saltanatları ele dawam etip atırǵan házirgi waqıtta Qaraqalpaqstan Respublikası Densawlıqtı saqlaw ministrligine qaraslı Taqıyatas rayonındaǵı «Balalar úyi»niń bes tárbiyalanıwshısınıń súnnet toyı bolıp ótti.
Usı múnásibet penen ótkerilgen ilajda Taqıyatas rayonınıń hákimi Farxad Allambergenov, Qaraqalpaqstan Respublikası Densawlıqtı saqlaw ministri Daniyar Xadjiev, Taqıyatas rayonınıń prokurorı Abat Jumamuratov shıǵıp sóylep, jıynalǵanlardı ulıwmaxalıqlıq Nawrız bayramı hám tárbiyalanıwshılardıń súnnet toyı menen qutlıqladı. Quwanıshlı toyları ótkerilip atırǵan jas náresteler Allayar Bazarbaev, Mexriddin Ravshanov, Alibek Jabbarbergenov, Avram Erimbetov hám Eldar Bayrambaevlardıń keleshekte elimizge belgili insanlar bolıp jetisiwine tilekleslik bildirdi. Hár bir balaǵa «Ózsanaatqurılısbank» akcionerlik-kommerciyalıq bankiniń rayonlıq filialınan 3 million sumnan ashılǵan amanat dáptershesi saltanatlı jaǵdayda tapsırıldı.
Ózbekstan Respublikası Prezidentiniń usı jıl 14-marttaǵı «Ózbekstan Respublikasınıń mámleketlik qáwipsizligi sistemasın jetilistiriw haqqında»ǵı pármanı menen qayta shólkemlestirilgen Ózbekstan Respublikası Mámleketlik qáwipsizlik xızmeti qáwenderliginde 2015-jılı Balalar úyiniń imaratı iri ońlawdan shıǵarıldı. Nátiyjede tárbiyalanıwshı nárestelerge barlıq qolaylı sharayatlar jaratıldı.
-Tárbiyalanıwshılarımızdıń súnnet toyın hár jılı kóterińki ruwxta ótkeriw dástúrge aylanbaqta,-deydi «Balalar úyi»niń bas shıpakeri Anjela Omirova.-Búgingi ilajǵa rayon hákimligi, ministrlikler menen vedomstvolardıń, huqıq qorǵaw uyımlarınıń, kárxana, mákemelerdiń basshıları, jámiyetlik shólkemlerdiń wákilleri ózleriniń sawǵaları menen qatnaspaqta. Bunıń ushın olarǵa sheksiz minnetdarshılıq bildiremiz.
Usı kúni tárbiyalanıwshılarǵa Qaraqalpaqstan Respublikası Mámleketlik qáwipsizlik xızmeti, respublika Prokuraturası, Densawlıqtı saqlaw ministrligi, rayon hákimligi, qáwender mákemelerdiń atınan bahalı sawǵalar tapsırıldı.
Respublikamız kórkem óner sheberleriniń ráńbáreń koncert baǵdarlaması balalarǵa quwanıshına quwanısh baǵıshladı. Ózbekstan hám Qaraqalpaqstanǵa xızmet kórsetken artist Maqset Ótemuratov, Qaraqalpaqstanǵa xızmet kórsetken artist Radjiv Atadjanov, «Nihol» sıylıǵınıń iyesi Gúlnaz Ótepova hám basqa da talant iyeleri, Qaraqalpaq mámleketlik quwırshaq teatrı artistleri, Xojelidegi 1-sanlı «Mehribanlıq úyi»niń «Tań juldızları» ansambli aǵzaları, «Balalar úyi»niń tárbiyalanıwshıları tárepinen atqarılǵan túrli millettiń qosıq hám ayaq oyınları ilaj qatnasıwshılarında ayrıqsha tásir qaldırdı.
D.ABIBULLAEV,
Qaraqalpaqstan xabar agentliginiń xabarshısı.