Paytaxtımızda elimizde isbilermenlik tarawında joqarı nátiyjelerge erisken bir topar isbilermenler menen jaslardıń ushırasıwları bolıp ótti.
Miymanlar dáslep Qaraqalpaqstan Respublikası Joqarǵı Keńesinde bolıp, jas isbilermenler menen ushırastı. Ilaj qatnasıwshıların Qaraqalpaqstan Respublikası Joqarǵı Keńesiniń Baslıǵı M.Erniyazov qutlıqlap, húrmetli Prezidentimiz Sh.Mirziyoevtiń basshılıǵında elimizde isbilermenlik ortalıǵın bunnan bılay da erkinlestiriw, kishi biznes hám jeke isbilermenlik subektlerin hár tárepleme qollap-quwatlaw baǵdarında ámelge asırılıp atırǵan keń kólemli ilajlarǵa toqtap ótti.
Atap ótilgenindey, 2017-2021-jıllarda Ózbekistan Respublikasın rawajlandırıwdıń bes tiykarǵı baǵdarı boyınsha Háreketler strategiyası demokratiyalıq mámleket qurıw hám puqaralıq jámiyetin rawajlandırıw baǵdarındaǵı reformalarda jaslardıń belsendiligin arttırıw menen baylanıslı bir qatar áhmiyetli wazıypalardı belgilep berdi. Usı wazıypalardı ámelge asırıwda Ózbekistan Respublikası Prezidentiniń 2017-jıl 5-iyuldegi «Jaslarǵa baylanıslı mámleketlik siyasattıń nátiyjeliligin arttırıw hám Ózbekistan jaslar awqamınıń jumısın qollap-quwatlaw haqqında»ǵı pármanı ayrıqsha áhmiyetke iye boldı. Ózbekistan Jaslar awqamı shólkemlestirilgen 30-iyun sánesi elimizde «Jaslar kúni» sıpatında belgilendi. Jaslardıń zamanagóy kásip-ónerlerdi puqta iyelewi ushın múnásip sharayatlardı jaratıw, bántligin támiyinlew, baslamaların xoshametlew, intellektuallıq hám dóretiwshilik potencialın júzege shıǵarıwǵa kómeklesiw jańadan shólkemlestirilgen jaslar awqamı jumısınıń áhmiyetli baǵdarlarınan biri sıpatında belgilendi. Sonıń menen birge, Prezidentimizdiń respublikamızda isbilermenlikti rawajlandırıw, xalıqtıń, sonıń ishinde, jaslardıń bántligin támiyinlewge bolǵan ayrıqsha itibarı nátiyjesinde 6 rayonda, yaǵnıy, Ámiӯdárya, Beruniy, Qońırat, Taqıyatas, Xojeli hám Shımbay rayonlarında kishi sanaat zonaların shólkemlestiriӯ názerde tutılǵan.
Miymanlar paytaxtımızdaǵı «Jaslar orayı»nda bolıp, bul jerde ónerment A.Nurımbetova tárepinen tayarlanǵan balalar hám hayal-qızlar ushın arnalǵan milliy kiyimler kollekciyası kórgizbesin tamasha etti. Sonday-aq, orayda háreket etip turǵan dógereklerdiń jumısları menen tanıstı. Jas isbilermenlerdiń joybarın tanıstırıw máresimi, óz-ara paydalı pikir alısıwlar boldı.
Ilaj qatnasıwshıları I.V.Savickiy atındaǵı Qaraqalpaq mámleketlik kórkem óner muzeyinde, paytaxtımızdaǵı «Kardar» hám «Muratbek mebel» juwapkershiligi sheklengen jámiyetlerinde bolıp, alıp barılıp atırǵan jumıslar menen tanıstı.
Usı kúni Berdaq atındaǵı Qaraqalpaq mámleketlik universitetinde «Tabısqa erisiw sırları» temasında master klass ótkerildi. Ilajda Xalıqaralıq biznes hám texnologiyalar associaciyasınıń baslıǵı Hikmat Abduraxmanov, «Dekos» kárxanasınıń tiykarın salıwshı Xasan Mamasaidov, «Deli» kárxanasınıń tiykarın salıwshı Xusan Mamasaidov, , «Murad Buildings» kárxanasınıń tiykarın salıwshı Murat Nazarov, «O’zbek-Xitoy Savdo Uyi» kárxanasınıń tiykarın salıwshı Uluǵbek Xolmatov, «Raynet», , «LeBazar» kárxanalarınıń tiykarın salıwshı Batır Arifanov, «My Taxi» kárxanasınıń tiykarın salıwshı Akmal Payziev, «Orient Capital Management» kárxanasınıń baslıǵı Anvar Irchaev shıǵıp sóylep, ózleriniń miynet jolı, isbilermenlikke dáslepki qádemleri, elimizde jas isbilermenlerge jaratılǵan sharayatlar boyınsha keń túrde maǵlıwmatlar berdi. Jaslar ózlerin qızıqtırǵan bir qatar sorawlarǵa juwap aldı.
-Jaslar awqamınıń baslaması tiykarında Global isbilermenlik tarmaǵı menen birgelikte elimiz boylap birinshi márte ótkerilgen ilajǵa mıńǵa shamalas jas isbilermen, fermer, «Biznes klub» aǵzaları, jámlespegen jaslar qatnastı hám bul olarda ayrıqsha tásir qaldırdı,-deydi Ózbekistan jaslar isbilermenligin qollap-quwatlaw orayı Qaraqalpaqstan bóliminiń baslıǵı Gáwhar Redjepova.- Bunday ilajlardıń ótkeriliwi isbilermenlikke jańa qádem taslap atırǵan jaslarımız ushın haqıyqıy tájiriybe mektebi bolıp xızmet etedi.
-Ilaj sheńberinde jaslardıń belsendiligi bizlerde ayrıqsha tásir qaldırdı,-deydi «Deli» kárxanasınıń tiykarın salıwshı Xusan Mamasaidov.-Sonıń menen birge, aymaqta isbilermenlikti rawajlandırıwda bir qansha imkaniyatlardıń bar ekenliginiń gúwası boldıq.
«Tabısqa erisiw sırları» temasındaǵı bunday ushırasıwlar keleshegimizdiń qurıwshıları bolǵan jaslarımızdıń isbilermenlik qábiletin bunnan bılay da rawajlandırıw, olardı kishi biznes hám jeke isbilermenlikke keńnen tartıwda ayrıqsha áhmiyetke iye boldı.
D.ABIBULLAEV,
Qaraqalpaqstan xabar agentliginiń xabarshısı.