Jaqın kúnlerde paytaxtımızda ulıwmaxalıqlıq Nawrız bayramına baǵıshlanıp «Aspazlar tańlawı» jarısı bolıp ótedi.
Tańlawda qala hám rayonlardaǵı restoran, kafe hám asxanalardan 40qa shamalas aspazdıń qatnasıwı kútilmekte.
-Elimizde turizmdi rawajlandırıw boyınsha keń kólemli ilajlar ámelge asırılıp atırǵan bir payıtta bunday tańlawlardı ótkeriw ayrıqsha áhmiyetke iye,-deydi «Qaraqalpaq ulıwma awqatlanıw» kárxanaları birlespesiniń baslıǵı Gúlmirza Yuldashev.-Maqsetimiz, respublikamızǵa kelip atırǵan kóp sanlı turistlerge xızmet kórsetiw mádeniyatın arttırıw, olarǵa óziniń ayrıqsha mazası menen ajıralıp turatuǵın milliy taǵamlarımızdı kórsetiw, umıtılıp baratırǵan taǵamlardı qayta tiklew, sonıń menen birge tarawǵa jaslardı kóbirek tartıw bolıp tabıladı. Sonlıqtanda, tańlaw qatnasıwshılarınan tek milliy taǵamlar emes, al shet el taǵamların tayarlaw, óziniń úlgili xızmet etiw mádeniyatın kórsetiwi talap etiledi.
Tańlaw qatnasıwshıların tárepinen tayarlanǵan taǵamlar Ózbekstan Aspazlar birlespesi, xalıqaralıq aspazlıq orayı, «Qaraqalpaq ulıwma awqatlanıw» kárxanaları birlespesi, sanitariya-epidemiologiyalıq baqlaw orayı wákillerinen ibarat tóreshiler quramı bahalap baradı. Ilaj juwmaǵında birinshi, ekinshi, úshinshi orın iyeleri, sonday-aq, «Eń jas aspaz», «Eń jaqsı salat», «Eń jaqsı shet el taǵamı», «Eń jaqsı milliy taǵam», «Eń jaqsı úlgili aspaz», «Ilajdıń belsendi qatnasıwshısı» nominaciyası jeńimpazları anıqlanıp, shólkemlestiriwshiler tárepinen sıylıqlanadı.
Esletip ótemiz, bul jarıs Ózbekstan Respublikası Prezidentiniń usı jıl 23-fevraldaǵı «2018-jılǵı Nawrız ulıwmaxalıqlıq bayramına tayarlıq kóriw hám onı ótkeriw haqqında»ǵı qararınıń orınlanıwın támiyinlew maqsetinde «Qaraqalpaq ulıwma awqatlanıw» kárxanaları birlespesiniń menen Ózbekstan Sawda-sanaat palatası Qaraqalpaqstan Respublikası basqarması menen birgeliktegi ilajları sheńberinde ulıwma awqatlanıw tarawında jumıs alıp barıp atırǵan isbilermenler arasında usı jarıstı ótkeriw boyınsha qabıl etilgen tiyisli qararǵa muwapıq ótkeriledi.
Qaraqalpaqstan xabar agentligi.