Paytaxtımızdaǵı 32-sanlı «Qosbulaq» mákan puqaralar jıyını aymaǵında «Meniń quyashím» mektepke shekemgi bilimlendiriw mákemesi paydalanıwǵa tapsırıldı.
Baqsha 80 balaǵa mólsherlengen bolıp, házirgi waqıtta 35 bala qabıl etilgen.
Bul jerde tárbiyalanıwshılar ushın barlıq sharayat jaratılǵan,-deydi «Meniń quyashím» mektepke shekemgi bilimlendiriw mákemesiniń baslıǵı Tamara Esbergenova.- Jámi 7 pedagog miynet etip atırǵan jámáátimizde balalar kúnine bes márte awqatlandırıladı. Olardıń bos waqıtların mazmunlı ótkeriw ushın ingliz tili, gimnastika, taekvon-do, ayaq oyın dógerekleri shólkemlestirilgen.
Esletip ótemiz, Prezidentimizdiń baslaması menen 2018-jıl Qaraqalpaqstan Respublikasında «Mektepke shekemgi bilimlendiriw jılı» dep belgilengen edi. Bıyılǵı jılı respublikamızda mámleketlik-jeke menshik sheriklik tiykarında 179, sonıń ishinde, paytaxtımız Nókis qalasında 30 balalar baqshasın jańadan shólkemlestiriw boyınsha mánzilli baǵdarlama tastıyıqlandı. Sonnan 102 si jańadan qurılatuǵın imaratta, 51 i bar imaratta hám 26 sı úy baqshası sıpatında shólkemlestiriledi.
Nókis qalalıq mektepke shekemgi bilimlendiriw bólimi janında balalar baqshalarına kommunallıq xızmet kórsetetuǵın arnawlı ońlaw ekspluataciyalıq xızmeti shókemlestirildi. Sonday-aq, 9 kóp tarmaqlı fermer xojalıǵı mektepke shekemgi bilimlendiriw mákemelerin sapalı azıq-awqat ónimleri menen támiyinleydi.
Ilajǵa Qaraqalpaqstan Respublikası Joqarǵı Keńesi Baslıǵınıń orınbasarı A.Hamraev qatnastı.
D.ABIBULLAEV,
Qaraqalpaqstan xabar agentliginiń xabarshısı