Ózbekstan Respublikası Prezidenti Shavkat Mirziyoev 26-mart kúni Kóksaray rezidenciyasında «Tınıshlıq procesi, qáwipsizlik tarawında birge islesiw hám regionallıq sheriklik» temasında Awǵanstan boyınsha joqarı dárejedegi Tashkent xalıqaralıq konferenciyasına qatnasıw ushın ámeliy sapar menen elimizge kelgen Awǵanstan Islam Respublikası Prezidenti Muhammad Ashraf Ǵanidi qabıl etti.
Ushırasıwda ellerimiz arasındaǵı jaqın qońsıshılıq qatnasıqların bunnan bılay da bekkemlew, sonday-aq, óz-ara paydalı ámeliy birge islesiwdi keńeytiw, sonıń ishinde, sawda, transport hám energetika tarawlarındaǵı joybarlardı, bilimlendiriw, densawlıqtı saqlaw hám basqa da baǵdarlardaǵı baǵdarlamalardı ámelge asırıw máseleleri kórip shıǵıldı.
Tárepler regionallıq hám xalıqaralıq áhmiyetke iye máseleler boyınsha da pikir alıstı.
Prezident Muhammad Ashraf Ǵani ellerimizdiń Awǵanstan boyınsha Tashkent xalıqaralıq konferenciyasın ótkeriwge baylanıslı birliktegi baslamasın júzege shıǵarıwǵa qaratılǵan háreketler ushın Ózbekstan Prezidenti Shavkat Mirziyoevqa shın júrekten minnetdarshılıq bildirdi, óz-ara paydalı baǵdarlar boyınsha birge islesiwdi bunnan bılay da keńeytiwge tayar ekenin atap ótti.
ÓzA