Shegara áskerleriniń Nókis qalasındaǵı áskeriy bóliminde 2018-jılǵa shaqırılǵan múddetli áskeriy xızmetkerlerdiń áskeriy antın qabıllawǵa baǵıshlanǵan ilaj bolıp ótti.
Oǵan Arqa-Batıs áskeriy okruginiń, Nókis qalası hákimliginiń, áskeriy bólimlerdiń basshıları, huqıq qorǵaw uyımlarınıń hám jámiyetlik shólkemlerdiń wákilleri, ata-analar qatnastı.
Ilajda Qaraqalpaqstan Respublikası Ministrler Keńesi Baslıǵınıń orınbasarı M.Álewov, 9115-sanlı áskeriy bólim komandiri polkovnik Z.Azizov, Milliy súwretshilik hám dizayn institutınıń prorektorı, professor D.Rahmatullaeva hám basqalar shıǵıp sóylep, jıynalǵanlardı bayram menen qızǵın qutlıqladı.
Soń áskeriy ant qabıl etiw máresimi ótkerildi.
Ilajda Ózbekstan Respublikası Qurallı Kúshleri Bas Sárkardası- Ózbekstan Respublikası Prezidentiniń 2017-jıl 4-apreldegi 2867-sanlı qararına muwapıq, 2017-jılǵı shaqırıwdaǵı múddetli áskeriy xızmetkerler arasınan ózleriniń úlgili xızmetleri menen kózge túsken 7 áskerge ata-analarınıń qatnasında joqarı oqıw orınlarına kiriw ushın jeńillik beretuǵın usınıslar jáne «Chegara qwshinlari alochisi» kókirek belgileri saltanatlı jaǵdayda tapsırıldı.
– Men balam Shariqulov Qádirbekti kóriw ushın Buxara wálayatı Qarakól rayonınan keldim. Ol ótken jılı áskerlikke shaqırılǵan edi. Mine, endi ol úyge aq júzli, abıroy menen qaytıw aldında turıptı. Onıń shın kewilden etken xızmetleri esapqa alınıp, oǵan joqarı oqıw orınlarına kiriw ushın jeńillik beretuǵın usınıs hám «Chegara qushinlari alochisi» kókirek belgisiniń beriliwi barlıq shańaraq aǵzalarımızdı úlken quwanıshqa bólemekte,-deydi ákesi Sh.Ǵafurov.
Ilajda usı jılı qabıllanǵan jas áskerlerdiń sapta júriw tayarlıǵı, qol urısı boyınsha ózlestirgen kónlikpeleriniń kórgizbeli shıǵıwları tamashalandı. Soń áskeriy bólimniń qural-jaraqları jáne támiynatı úlgileriniń kórgizbesi ótkerildi.
Ata-analar balaları menen kórisip, komandirleri menen ushırasıp áskeriy bólimdegi sharayatlar menen tanıstı.
Á.Jiemuratov,
Qaraqalpaqstan xabar agentliginiń xabarshısı.
(M.Habibullaevtıń túsirgen súwretleri).