Qaraqalpaqstan Respublikası veterinariya komiteti tárepinen búgingi kúnde báhár kelip kúnniń qızıwına baylanıslı haywanlarda ushırasatuǵın qutırıw keselligine qarsı gúresiw boyınsha keń kólemli ilajlar ámelge asırılmaqta.
Mine usı ilajlarda jıl basınan berli tiyisli xızmetkerlerdiń qatnasında respublikamız boyınsha jámi 26 mıńnan aslam xojalıqlarǵa tiyisli úy haywanları bolǵan 20 mıńnan aslam iyt hám pıshıq klinikalıq tekseriwlerden ótkerilgen. Sonday-aq, adamlarǵa hám haywanlarǵa jaraqat jetkizgen 356 iyt, 29 pıshıq klinikalıq tekseriwlerden ótkerilgen. 6 mıńǵa shamalas iytke tiyisli gúwalıqlar berilgen hám 15 mıńnan aslam iyt hám pıshıqqa qutırıw keselligine qarsı shanshıw jumısları alıp barılǵan. Jámi 360 tan aslam haywan emlenip, 850 den aslamı joq etilgen.
Komitettiń haywanlardıń densawlıǵın saqlaw bóliminiń qánigesi G.Berdimuratovtıń bildiriwinshe, búgingi kúnde respublikamız aymaǵında jámi 128 zooveterinariya shaqapshaları bar bolıp, sharwashılıqtı rawajlandırıw Baǵdarlamasındaǵı veterinariya tarawına tiyisli tapsırmalardıń orınlanıwı boyınsha bir qatar jumıslar ámelge asırılmaqta.
– Atap aytqanda, 2017-jıl dawamında «Násil xızmet» kárxanasınan 130 mıń 88 dana násilli buǵanıń tuqımı alınǵan hám 101 mıń 182 bas sıyırlar jasalma tuqımlandırılǵan. Sonday-aq, usı baǵdarlamaǵa tiykarlanıp Qaraqalpaqstan Respublikası veterinariya komiteti hám onıń shólkemlerinde iri ońlaw hám úskenelew jumıslarına jámi 662 million sum qarjı jumsalǵan. Sonnan epizootikalıq turaqlılıqtı támiyinlew maqsetinde komitet tárepinen 14 motocikl, 23 velosiped, 100 búrkewshi, 36 mikroskop, 55 dyuar ıdısı, 107 termosumka alınıp qalalıq hám rayonlıq veterinariya bólimlerine tarqatılǵan.
Respublika veterinariya inspektorları hám basqa da tiyisli shólkemler tárepinen «Veterinariya haqqında»ǵı nızamnıń 18-statyasına muwapıq, veterinariya-sanitariya qaǵıydaların buzǵanlıǵı ushın Ózbekstan Respublikası Hákimshilik juwapkershilik haqqındaǵı kodekstiń 109-statyasına boyınsha 96 jeke puqaraǵa jámi 11 million 648 mıń 745 sum muǵdarında hákimshilik járiyma salınǵan. Sonnan veterinariya xızmeti inspektorları tárepinen 11 puqaraǵa 1 million 692 mıń 639 sum, Diyqan bazarındaǵı VSE laboratoriyaları baslıqları tárepinen 85 puqaraǵa jámi 9 million 956 mıń 106 sum muǵdarında hákimshilik járiymalar qollanılǵan.
Ótken 2017-jıl dawamında epizootiyaǵa qarsı gúresiw boyınsha 20 diagnostikalıq tekseriw, 28 profilaktikalıq, 3 dezinfekciyalaw, dezinsekciyalaw jumısları ámelge asırıldı.
Á.Jiemuratov.
Qaraqalpaqstan xabar agenliginiń xabarshısı.