Qaraqalpaqstan Respublikasında ótken jılı bir qatar jámiyetlik shólkemlerdiń tıǵız birge islesiwi 405 puqaralar jıyınınıń 107 sinde tınıshlıqtıń támiyinleniwine xızmet etti. Al, 2018-jılı jańadan jumıs baslaǵan 5 mákan puqaralar jıyını qosılıp, 410 máhálleniń 378 inde jınayat júz bermegen.
Bul haqqında Nókis qalası hákimliginde bolıp ótken «Toy máresimler – milliy qádriyatlarımız sıpatında» atamasındaǵı sáwbetlesiw keshesinde xabar berilip, birge islesiw nátiyjesinde sońǵı waqıtları háwij alıp atırǵan milliyligimizge de, sháriyatımızǵa da jat illetlerdi saplastırıwǵa erisiletuǵını atap ótildi. Ilajǵa Nókis qalasındaǵı 58 mákan puqaralar jıyınınıń aqsaqalları, keńesgóyleri, toy máresimlerin ótkeriw boyınsha komissiya aǵzaları, jámiyetlik shólkemlerdiń hám ǵalaba xabar qurallarınıń wákilleri qatnastı.
Ózbekstan «Milliy tiklanish» demokratiyalıq partiyası Qaraqalpaqstan Respublikalıq Keńesi hám «Máhálle» qayırqomlıq jámiyetlik fondınıń Nókis qalalıq bólimi tárepinen shólkemlestirilgen ilajda toy máresimlerin ótkeriwdi tártipke salıw boyınsha qánigelerdiń pikiri tıńlanıp, tiykarǵı itibar – úrp-ádet, dástúrlerimizdegi artıqsha ısırapgershilikti saplastırıw, puqaralardı dábdebepazlıqtan qaytarıw máselelerine qaratıldı.
Shıǵıp sóylewshilerdiń pikirleri dawamında janaza hám basqa da marhumlardıń esteligine baǵıshlanǵan merekelerdegi unamsız jaǵdaylardıń, ısırapgershiliktiń azayǵanı atap ótildi.
Sáwbetlesiw keshesi dawamında toy máresimlerin ıqshamlastırıw qaǵıydalarına boysınbaǵan puqaralardı erkinen ayırıw, járiyma tólew jazalarına tartıw sıyaqlı bir qansha usınıslar bildirildi. Ilajdan gózlengen tiykarǵı maqset – jámiyettegi kewilsiz jaǵdaylardı saplastırıw ushın usınıslardı úyreniwden ibarat edi.
1998-jılı 28-oktyabrde Ózbekstan Respublikasınıń Birinshi Prezidenti Islam Kárimov tárepinen «Toy máresimlerin, shańaraqlıq saltanatlardı, mereke hám máresimlerdi, marhumlardıń esteligine baǵıshlanǵan ilajlardı ótkeriwdi tártipke salıw haqqında»ǵı Pármanına qol qoyılǵan bolsa, aradan 4 jıl ótip 2012-jılı Xalıq deputatları Tashkent qalalıq Keńesiniń usı mazmundaǵı qararı járiyalanǵan edi. Bul qararda da sońǵı waqıtları háwij alıp atırǵan dábdebeli toylardaǵı artıqsha qárejetlerdiń jumsalıwın saplastırıw máselesi kóterilgen edi.
Bul máselege Ózbekstan Respublikası Prezidenti Shavkat Mirziyoev 3–avgust kúni dóretiwshi zıyalılar menen ushırasıwı waqtında da ayrıqsha toqtap ótken edi.
Ilajdı Puqaralardıń ózin-ózi basqarıw uyımları jumısların muwapıqlastırıw boyınsha Qaraqalpaqstan Respublikalıq Keńesi baslıǵınıń 1-orınbasarı, Respublikalıq «Máhálle» fondınıń, «Milliy tiklanish» demokratiyalıq partiyası Qaraqalpaqstan Respublikalıq Keńesiniń baslıǵı T.Romanov basqarıp bardı.
M.PIRNAZAROVA,
Qaraqalpaqstan xabar agentliginiń xabarshısı.