Namangan wálayatında jasawshı Názigúl Ismaylova degen qız biydárek joǵalǵan edi.

Bul qız Qaraqalpaqstan Respublikası Ishki isler ministrligi patrul-post xızmeti basqarmasınıń xızmetkeri, qatardaǵı Izbasar Fazılov hám milliy gvardiya xızmetkeri, serjant Rustam Xidirov tárepinen tabılıp, usı jıl 20-fevral kúni ata-anasına tapsırıldı.

Huqıq qorǵaw uyımları xızmetkerleriniń qıraǵılıǵı nátiyjesinde ata-anasınıń bawırına qaytarılǵan qızdıń anası Dilnoza Parpievadan jaqında Qaraqalpaqstan Respublikası Ishki isler ministrligine minnetdarshılıq xatı keldi. Onda bılay delinedi:

«Úshqorǵan rayonı «Yoǵdu» mákan puqaralar jıyını aymaǵında Nurabat kóshesi 44-jayda jasayman. Qızım úyden shıǵıp ketip, biydárek joǵalǵan edi. Qaraqalpaqstan Respublikası Ishki isler ministrligi patrul-post xızmeti basqarmasınıń xızmetkeri, qatardaǵı Izbasar Fazılov hám gvardiya xızmetkeri, serjant Rustam Xidirovlar ózleriniń xızmet wazıypasın atqarıw payıtında qızımdı tawıp berip, qáwip-qáterdiń aldın aldı. Bunıń ushın bul xızmetkerlerge óz minnetdarshılıǵımdı bildiremen».

Biz de óz gezeginde elimizdiń tınıshlıǵı, xalqımızdıń abadan turmısın támiyinlew jolında kúni-túni xızmet atqarıp kiyatırǵan ishki isler uyımları xızmetkerleriniń jumısında tabıslar tilep qalamız.

D.ABIBULLAEV,

Qaraqalpaqstan xabar agentliginiń xabarshısı.