Koreya Respublikası menen Qaraqalpaqstan arasındaǵı sırtqı sawda aylanısı ótken jılı 28 million 427 mıń AQSh dollarınan artttı. Keyingi eki jıllıq kórsetkishler boyınsha nırqı 50 mln AQSh dollarına shamalas boyan tamır ónimleri Koreya Respublikasına eksport etilgen.
Búgingi kúnde Qaraqalpaqstan Respublikasında Qubla Koreya investorlarınıń qatnasıwında 7 qospa kárxana óz jumısların alıp barmaqta.
Atap aytqanda, gazdı qayta islew arqalı polietilen hám polipropilen ónimlerin shıǵaratuǵın «UZ-KOR GAS CHEMICAL» kárxanası, boyan tamırın qayta islewge qánigelesken Xojeli rayonındaǵı «KYUNG DONG SLICE», Taqıyatas rayonındaǵı «DAE YOUNG LICORICE», qurılıs tarawında birge islesetuǵın Qońırat rayonındaǵı «WESTSTROY GROUP», sonday-aq, ótken jıldıń avgust ayınan berli jumıs alıp barıp atırǵan Qońırat rayonı aymaǵındaǵı sharwashılıq ónimlerin qayta islewge qánigelesken «ZAM AND AAS» qospa kárxanalarınıń aymaqtıń ekonomikasında tutqan ornı girewli.
Bul kórsetkishler mámleketlerimiz arasındaǵı sawda-ekonomikalıq baylanıslardıń jedel pátlerde rawajlanıp baratırǵanlıǵın kórsetedi.
Koreya Respublikasınıń Ózbekstan ekonomikasına kirgizgen investiciyalarınıń kólemi bolsa 7 milliard AQSh dollarınan artıp ketti. Elimizde Qubla Koreya kapitalınıń qatnasıwında 461 kárxana óz jumısların ámelge asırmaqta. Bul kárxanalar neft-gaz, ximiya, qazıp alıw, mashina óndirisi, elektrotexnika hám toqımashılıq tarawlarında, informaciyalıq kommunikaciyalar, transport hám logistika, sonday-aq, turizm baǵdarlarında nátiyjeli jumıs alıp barmaqta.
Esletip ótemiz, ótken jıldıń 22-25-noyabr kúnleri Prezidentimiz Shavkat Mirziyoevtiń Koreya Respublikasına mámleketlik saparı dawamında eki mámlekettiń ekonomikalıq hám finanslıq strukturalarınıń basshıları, jetekshi isbilermenleriniń qatnasıwında Qubla Koreya-Ózbekstan biznes-forumı shólkemlestirilgen edi.
Biznes-forumda elimiz basshısı eki mámleket arasındaǵı sawda-ekonomikalıq baylanıslar rawajlanıp atırǵanın, Ózbekstanda biznes júrgiziw ushın jeterli sharayat jáne múmkinshilikler jaratılǵanın atap ótip, Ózbekstan Koreya Respublikasınıń biznes wákilleri menen birge islesiwden mápdar ekenligin bildirgen edi.
Bul kórsetkishlerdiń barlıǵı mámleketler arasındaǵı doslıq hám óz ara máplerge tiykarlanǵan qarım-qatnasıqlarımızdıń bekkemliginen dárek beredi.
Islam Matekov,
Qaraqalpaqstan xabar agentliginiń sholıwshısı