Burın xabar etilgenindey, 1-fevral kúni Qaraqalpaqstan Respublikası Mádeniyat ministrligi tárepinen «Ǵárezsiz elime xosh keldiń, Nawrız!» atamasındaǵı tańlaw járiyalanǵan edi.
13-fevral kúni paytaxtımızdaǵı 22-sanlı balalar muzıka hám kórkem óner mektebinde usı tańlawdıń respublikalıq basqıshı ótkerildi.
Oǵan respublikamızdıń barlıq qala hám rayonlarınan 50ge jaqın qosıqshılar qatnastı. Tańlaw qatnasıwshıları ana-Watan, Nawrız bayramı, báhár paslına arnalǵan jańadan dórelgen qosıqlar fonogrammasız, janlı hawazda atqarıldı.
Tájiriybeli tóreshiler tárepinen tańlawda «Eń jaqsı qosıq teksti» nominaciyası boyınsha Altıngúl Ájiniyazova birinshi, Axmet Tájimuratov ekinshi, Gulyash Zarimova úshinshi orın jeńimpazları dep tabılǵan bolsa, «Eń jaqsı qosıq atqarıwshısı» nominaciyası boyınsha Gúlnara Istitullaeva (Xojeli rayonı) birinshi, Shımbay rayonlıq 8-sanlı balalar muzıka hám kórkem óner mektebiniń «Xalıq sazları ansambli» ekinshi, Vaxobjan Abdullaev (Ámiwdárya rayonı) sıylı úshinshi orın iyeleri dep tabıldı. Sonday-aq, tańlawdıń «Eń jaqsı nama dóretiwshisi» nominaciyasında Nurnazar Qállibekov birinshi, Záripbay Xalmuratov ekinshi, Ádil Temirbaev úshinshi orın jeńimpazı dep tabıldı.
Tańlawda belsene qatnasqan qatnasıwshılar hám tańlaw jeńimpazlarına shólkemlestiriwshiler tárepinen diplom hám estelik sawǵaları tapsırıladı.
Eń jaqsı qosıq atqarıwshıları dep tabılǵan qosıqshılar respublika kóleminde ótkeriletuǵın 21-mart-Xalıqaralıq Nawrız bayramına baǵıshlanıp ótkeriletuǵın koncert baǵdarlamasına qatnasıw imkaniyatına iye boldı.
Tárbiya SEYTNAZAROVA,
Qaraqalpaqstan xabar agentligi xabarshısı