Usı jıldıń 10-12-fevral kúnleri aralıǵında Rossiya Federaciyasınıń Ekaterinburg qalasında ótkerilgen «Kraski narodov mira v proektax berega nadejdı» tańlawına folklor jónelisi menen qatnasqan jerlesimiz Muhammed Tórebekov gran-pri jeńimpazı boldı. (Tańlawda qaraqalpaq alamoynaq duwtarı menen «Sayatxan-Hamra» dástanın atqarıp shıqtı.)
Bul haqqında bizge jeńimpazdıń ózi Muhammed Ekaterinburg qalasınan xabar bermekte.
Muhammed usı tabısı menen 26-mart hám 4-aprel kúnleri Qırımda ótkeriletuǵın «Parij, ya lyublyu tebya» («Men seni súyemen, Parij») atamasındaǵı 27-xalıqaralıq balalar hám jas óspirimler tańlawınıń super final basqıshına qatnasıw ushın jollamanı da qolǵa kirgizdi.
Maqalamız qaharmanı 1999-jılı Nókis qalasında tuwılǵan. Balalıǵınan kórkem ónerdi ján-táni menen súyedi. Muhammed paytaxtımızdaǵı 1-sanlı Esjan baqsı atındaǵı balalar muzıka hám kórkem óner mektebinde oqıp, ustazı Búrkitbay Piyazovtan kórkem ónerdiń álwan túrli sırların úyrenedi.
«Jigitke qırıq óner de az» degenindey, ol dombıra sáz ásbabın kámine keltirip shertip, qazaq xalqınıń kúylerin atqara aladı. Sonday-aq, ol «Sayatxan-Hamra» dástanın tolıq yadlap alǵan.
M.Tórebekov Nókis mádeniyat hám kórkem óner kollejdinde oqıp júrgen waqtında ustazı, Ózbekistan xalıq baqsısı Teńel Qállievke shákirt túsip, ustazınıń tapsırmaların buljıtpay orınlaydı.
Házirgi kúnde jas talant iyesi Muhammed Ájiniyaz atındaǵı Nókis mámleketlik pedagogikalıq institutınıń muzıkalıq tálim baǵdarınıń 1-basqısh studenti.
-Bunday jetiskenliklerge erisiwimde anam Rawshan hám ustazım Teńel aǵanıń úlesleri kóp, – deydi M.Tórebekov.
Maǵlıwmat ornında aytıp ótetuǵın bolsaq, usı jıldıń 4-7-yanvar kúnleri aralıǵında Qazaqstan Respublikasınıń Astana qalasında ótkerilgen «Art-Premium» xalıqaralıq tańlawına jerlesimiz Muhammed Tórebekov qatnasıp, jeńimpazı atanıp, kuboktı qolǵa kirgizip qaytqan edi.
Esletip ótemiz, bul tańlawlar Rossiya Federaciyası tárepinen shólkemlestirilgen.
Tárbiya SEYTNAZAROVA,
Qaraqalpaqstan xabar agentligi xabarshısı