Aldın xabar bergenimizdey, Tórtkúl rayonındaǵı «SAFETY FILTR» juwapkershiligi sheklengen jámiyeti tárepinen jańa innovaciyalıq joybar – tábiyǵıy gazdı filtrleytuǵın úskene islep shıǵarıw jolǵa qoyılǵan edi.
Xosh, bul úskene qanshelli paydalı? Tutınıwshılar úskene haqqında qanday pikirde?
Tórtkúl rayonı orayındaǵı Tashkent kóshesiniń turǵını Husan Davletov:
– 2016-jıldıń avgust ayında úyimizdegi gaz esaplaǵısh islemey qalıp, rayonlıq gaz támiyinlew bólimi qánigelerine múrájat ettim. Olar maǵan tábiyǵıy gazdı filtrleytuǵın úskene ornatıwdı usınıs etti. Men úskenege buyırtpa berdim. Qánigeler sol kúnniń ózinde úskeneni ornatıp berdi. Sonnan berli gaz basımı aldınǵıdan da jaqsılandı. Bul jańadan oylap tabılǵan tábiyǵıy gazdı filtrleytuǵın úskeneniń paydası dep oylayman. Bunı jaqınlarıma, tamır-tanıslarıma da usınıs etip atırman.
Tórtkúl rayonı orayındaǵı Diyonat kóshesiniń turǵını Farida Yuldasheva:
– Ótken jılı dekabr ayında usı filtrleytuǵın úskeneni ornatqanımızdan keyin úyimizde gaz basımı jaqsılanıp, gaz esaplaǵısh ta bir tegis isleytuǵın boldı. Bul úskeneniń birinshi gezekte biz – úy biykeleri ushın paydası kóp eken.
Qaraqalpaqstan xabar agentligi