Qaraqalpaqstan Respublikası bajıxana basqarması hám huqıq qorǵaw mákemeleri xızmetkerleri tárepinen orınlarda ótkerilgen operativ izlew ilajları dawamında bir neshe puqaralardıń nızamsız túrde qural saqlap atırǵanlıǵı anıqlandı. Bul boyınsha Mámleketlik bajıxana komitetiniń rásmiy veb-saytı xabar bermekte.

Nókis rayonında ótkerilgen ilaj dawamında puqara Q.Djumaniyazovtıń úyi óz razılıǵı menen gúwalar qatnasında kózden ótkerilgende, úyiniń arqa tárepinde jaylasqan malxanasınında qamıslar arasına jasırıp qoyılǵan, hesh qanday hújjetlersiz 2 dana aw mıltıǵı, 23 gilza, 34 kapsyullardı nızamsız túrde saqlap atırǵanlıǵı anıqlanǵan.

Sonday-aq, Końırat rayonında alıp barılǵan ilajlarda A.Aytmuratovtıń úyinen puqara razılıǵı menen qalıs gúwalar qatnasında kalibri 16 mm. 1 dana bir stvolli aw mıltıǵı hám 3 dana gilzalar tabılǵan.

Kegeyli rayonında jasawshı puqara A.Tursınovtıń úyi de ámeldegi tártip boyınsha kózden ótkerilgende, bul jerde 1 dana eki stvollı aw mıltıǵı hesh qanday hújjetlersiz saqlanıp atırǵanlıǵı anıqlandı.

Qaraqalpaqstan temir jol stanciyasında 324-sanlı Volgograd-Tashkent jolawshı tasıwshı poezdı bajıxana tekseriwinen ótkerilgende respublikamız puqarası B.Palvanov jolawshı bajıxana deklaraciyasında kórsetilmegen 9 kg. aw mıltıǵınıń drobların nızamsız túrde Rossiya Federaciyasınan Ózbekstan Respublikasına alıp kiyatırǵanda irkildi.

Joqarıda anıqlanǵan jaǵdaylar boyınsha huqıqbuzarlarǵa sud tárepinen tiyisli jaza ilajları qollanıldı.

Dilafruz AYTBAEVA

QMU, jurnalistika tálim

baǵdarı 4 kurs studenti