Usı jıl 28-fevral kúni Ózbekstan Respublikası Prezidentiniń «Mámleketlik mektepke shekemgi bilimlendiriw mákemeleri xızmetkerleriniń ayırım kategoriyaları miynetine haqı tólewdi jetilistiriw ilajları haqqında»ǵı qararı qabıl etildi. Usı qarar menen mektepke shekemgi bilimlendiriw mákemeleriniń ayırım xızmetkerleriniń miynetine haqı tólewdi 2 basqıshta 2018-jıl 1-marttan hám 1-sentyabrden arttırıw názerde tutılǵan.
Sonıń nátiyjesinde mámleketlik mektepke shekemgi bilimlendiriw mákemelerinde miynet etip atırǵan jámi 3764 xızmetker, sonnan 308 baslıq, 461 joqarı maǵlıwmatlı tárbiyashı, 2162 orta arnawlı maǵlıwmatlı tárbiyashı, 69 metodist, 14 defektolog, 143 psixolog, 365 muzıka basshısınıń miynet haqıları sezilerli dárejede arttırıladı.
Bul mektepke shekemgi bilimlendiriw sistemasında jumıs islep atırǵan basshı hám pedagog xızmetkerlerdiń, mektepke shekemgi bilimlendiriw mákemesindegi tálim-tárbiyaǵa juwapker xızmetkerlerdiń miynetin xoshametlewge qaratılǵan itibardıń baslaması bolıp, mektepke shekemgi bilimlendiriw mákemeleri pedagog xızmetkerleriniń talantın, kásiplik sheberligin júzege shıǵarıw jolında iygilikli ilajlar taǵı da ámelge asırıla beredi, dep isenemiz.
Qaraqalpaqstan xabar agentligi.