Usı jıl 20-22-fevral kúnleri Ámiwdárya hám Tórtkúl rayonlarında «Basqarıw uyımları, Ayrıqsha jaǵdaylar boyınsha mámleketlik strukturalardıń aymaqlıq strukturaları hám funkcionallıq tómengi strukturalarınıń tábiyǵıy hám texnogenlik qásiyetke iye ayrıqsha jaǵdaylardıń aqıbetlerin saplastırıw boyınsha háreketi» temasında sárkardalıq shtab oqıw-shınıǵıwları bolıp ótti.

Oǵan Ámiwdárya hám Tórtkúl rayonları hákimiyatlarınıń, ayrıqsha jaǵdaylar boyınsha mámleketlik strukturalardıń aymaqlıq tómengi strukturalarınıń, ekonomikalıq obektlerdiń, kárxana hám shólkemlerdiń basshıları, qánigeleri, evakuaciya komissiyaları, jıyma komandalar, MPJ, APJ baslıqları hám puqaralar qatnastı.

Dáslepki kúni rayondaǵı birinshi medicinalıq járdem otryadı menen rayonlıq jıyma komandanıń saptan ótiw tańlawı ótkerilip, shártli túrde jer qozǵalıwı nátiyjesinde jábirlengen adamlarǵa medicinalıq járdem kórsetiw boyınsha ilajlar ótkerildi. Soń rayonlardaǵı liceylerde puqaralıq qorǵanıw ilajları ótkerilip, «Qıpshaq» APJ, «Markazabat» MPJ aymaǵında qutırıw keselliginiń aldın alıwdaǵı birge islesiw háreketleri ámelde kórsetildi. Bul ilajlarda mıńǵa shamalas adam qatnastı. Kúnniń ekinshi yarımında «Qıpshaq panton kópiri»nde hám Tórtkúl rayonlıq «Agrobank»te «Tábiyǵıy texnogenlik qásiyetke iye ayrıqsha jaǵdaylar júz bergende obekttiń basshılar quramınıń, puqaralıq qorǵanıw strukturalarınıń hám rayon hákimshiligi xızmetlerińiń birgeliktegi háreketi» temasında arnawlı-taktikalıq oqıw shınıǵıwları ótkerildi.

Ilajdıń ekinshi kúni de oqıw-shınıǵıwlarına bay boldı. «Qarataw» jarılıwshı zatlardı saqlaw qoymaxanasında, «Taqıyatasneftbazası» JShJnıń Qarataw filialında, «Tórtkúldánónimleri» JShJda arnawlı oqıw-taktikalıq shınıǵıwlar ótkerildi.

Úshinshi kúndegi ilajlar «Orta qala» APJda, «Túyemoyın» suw tazalaw imaratında, «Tórtkúlneftbazası»nda, ulıwma bilim beriw mekteplerinde dawam etti.

Ótkerilgen ilajlarǵa jámi 41 mıńnan aslam adam hám 343 texnika tartıldı,-deydi Qaraqalpaqstan Respublikası Ayrıqsha jaǵdaylar basqarması xızmetkeri I.Qosbaev. – Ilajlar dawamında kewilsiz jaǵdaylar júz bermedi.

Ilajda oqıw-shınıǵıwına belsene qatnasqan bir qatar puqaralar shólkemlestiriwshiler tárepinen tayarlanǵan húrmet jarlıǵı hám estelik sawǵaları menen sıylıqlandı.

Á.Jiemuratov,

Qaraqalpaqstan xabar agentliginiń xabarshısı.