Сенатда Халқаро рейтинг ва индекслар билан ишлаш бўйича республика кенгашининг навбатдаги йиғилиши бўлиб ўтди.

Сенат Раиси, Халқаро рейтинг ва индекслар билан ишлаш бўйича республика кенгаши раиси Танзила Норбоева бошқарган йиғилишда мамлакатимизда олиб борилган ислоҳотлар натижасида қатор халқаро рейтинг ва индексларда Ўзбекистоннинг ўрни яхшилангани таъкидланди.

Хусусан, ўтган йилда устувор этиб белгиланган 20 рейтингнинг 12 тасида Ўзбекистоннинг ўрни яхшиланди. Жумладан, “Moodyʼs” халқаро рейтинг агентликлари томонидан Ўзбекистоннинг суверен кредит рейтинг кутилмаси илк бор “барқарор”дан “ижобий”га оширилди. Электрон ҳукуматни ривожлантириш рейтингида Ўзбекистон 193 давлат орасида 63-ўринни эгаллаб, 6 поғонага юқорилади.

Ўзбекистон ютуқлари илк маротаба Жаҳон банкининг янги “Business Ready” рейтингида эътироф этилди. Жумладан, мамлакатимиз учта индикатор бўйича изчил ислоҳотларни амалга оширган 29 мамлакат қаторига киритилиб, “Амалиётнинг осонлиги” йўналиши бўйича 1-гуруҳда “топ-10”таликдан жой олди.

Мажлисда Ўзбекистон Республикасининг устувор халқаро рейтинг ва индекслардаги ўрни яхшиланиши тўғрисидаги иккинчи миллий маъруза лойиҳаси кўриб чиқилиб, қатор тавсиялар берилди. Жумладан, устувор халқаро рейтинг ва индекслар билан ишлаш самарадорлигини ошириш, пасайиш кузатилган ва ўзгаришсиз қолаётган халқаро рейтинглар ва уларнинг таркибий индикаторларидан келиб чиқиб ислоҳотларни жадаллаштириш зарурлиги қайд этилди.

2025 йил учун Ўзбекистон Республикасининг устувор халқаро рейтинг ва индекслардаги ўрнини яхшилашга қаратилган амалий чора-тадбирлар дастурларининг ижроси масаласи муҳокама марказида бўлди.

Мажлисда Ўзбекистон учун устувор бўлган халқаро рейтингларда мамлакатимиз ўрнини яхшилаш бўйича 2026 йилга мўлжалланган амалий чора-тадбирлар дастурлари (“йўл харитаси”) ҳамда илмий ташкилотларнинг илмий-тадқиқот лойиҳаларини амалга ошириш бўйича йиллик режалари лойиҳалари ҳам кўриб чиқилиб, Республика кенгашининг тегишли қарори қабул қилинди.

Н.Абдураимова, ЎзА