Senatta Xalıqaralıq reyting hám indeksler menen islesiw boyınsha respublikalıq keńestiń gezektegi májilisi bolıp ótti.
Senat Baslıǵı, Xalıqaralıq reyting hám indeksler menen islesiw boyınsha respublikalıq keńestiń baslıǵı Tanzila Norboeva basqarǵan májiliste mámleketimizde alıp barılǵan reformalar nátiyjesinde bir qatar xalıqaralıq reyting hám indekslerde Ózbekstannıń ornı jaqsılanǵanı atap ótildi.
Atap aytqanda, ótken jılı tiykarǵı etip belgilengen 20 reytingtiń 12 sinde Ózbekstannıń ornı jaqsılandı. Sonıń ishinde, “Moodyʼs” xalıqaralıq reyting agentlikleri tárepinen Ózbekstannıń suveren kredit reyting kútiwi birinshi márte “turaqlı”dan “unamlı”ǵa kóterildi. Elektron húkimetti rawajlandırıw reytinginde Ózbekstan 193 mámleket arasında 63-orındı iyelep, 6 tekshege kóterildi.
Ózbekstannıń jetiskenlikleri birinshi márte Jáhán bankiniń jańa “Business Ready” reytinginde tán alındı. Sonıń ishinde, mámleketimiz úsh indikator boyınsha izbe-iz reformalardı ámelge asırǵan 29 mámleket qatarına kirgizilip, “Ámeliyattıń ańsatlıǵı” baǵdarı boyınsha 1-toparda “top-10” lıqtan orın aldı.
Májiliste Ózbekstan Respublikasınıń tiykarǵı xalıqaralıq reyting hám indekslerdegi ornın jaqsılaw haqqındaǵı ekinshi milliy bayanat joybarı kórip shıǵılıp, bir qatar usınıslar berildi. Sonıń ishinde, tiykarǵı xalıqaralıq reyting hám indeksler menen islesiw nátiyjeliligin arttırıw, tómenlew baqlanǵan hám ózgerissiz qalıp atırǵan xalıqaralıq reytingler hám olardıń strukturalıq indikatorlarınan kelip shıǵıp reformalardı jedellestiriw zárúr ekenligi atap ótildi.
2025-jıl ushın Ózbekstan Respublikasınıń tiykarǵı xalıqaralıq reyting hám indekslerdegi ornın jaqsılawǵa qaratılǵan ámeliy ilajlar baǵdarlamalarınıń orınlanıwı máselesi dodalaw orayında boldı.
Májiliste Ózbekstan ushın tiykarǵı bolǵan xalıqaralıq reytinglerde mámleketimizdiń ornın jaqsılaw boyınsha 2026-jılǵa mólsherlengen ámeliy ilajlar baǵdarlamaları (“jol kartası”) hám ilimiy shólkemlerdiń ilimiy-izertlew joybarların ámelge asırıw boyınsha jıllıq rejeleriniń joybarları da kórip shıǵılıp, Respublikalıq keńestiń tiyisli qararı qabıl etildi.

N.Abduraimova, ÓzA