Қисқа, аниқ ва ишончли ахборот – глобал дунёда тезкор хабардорлик гаровидир. Бинобарин, ЎзА жаҳонда содир бўлаётган энг муҳим воқеаларни қисқа сатрларда ёритишда давом этади.

Женевада АҚШ–Эрон музокараларининг янги босқичи

Ўмон воситачилигида АҚШ ва Эрон ўртасидаги ядровий музокараларнинг навбатдаги раунди пайшанба куни Женевада ўтказилади. Эрон ташқи ишлар вазири Аббос Арақчи мазкур йиғин дипломатик ечим учун “яхши имконият” бўлишини таъкидлаган. Шу билан бирга, Вашингтон минтақада ҳарбий кучларни кучайтириб, қўшимча ҳаво мудофаа тизимларини жойлаштирган.

Оқ уй раҳбари Дональд Трамп музокаралар муваффақиятсиз якунланса, чекланган зарбалар эҳтимолини истисно қилмади. Теҳрон эса фақат ядровий дастур масаласи муҳокама қилинаётганини, уранни бойитиш ҳуқуқидан воз кечмаслигини айтмоқда. Томонлар ўртасидаги келишмовчиликлар сақланиб турган бир пайтда, ҳар иккиси ҳам ҳар қандай сценарийга тайёр эканини билдирган.

Венгрия Киевга ультиматум қўймоқда

Венгрия 20-санкциялар пакети қабул қилинишига қарши эканини эълон қилди. Мамлакат ташқи ишлар вазири Петер Сийярто айтишича, Украина Россия зарбасидан шикастланган “Дружба” қувурини таъмирлаб, Венгрияга нефть транзитини қайта тикламас экан, Будапешт пакетни қўллаб-қувватламайди.

Расмий Киев бу баёнотларни “шантаж ва ультиматум” деб атади. Айни пайтда Словакия ҳам нефть таъминоти тикланмаса, Украинага электр энергияси етказиб беришни тўхтатиш билан таҳдид қилган. Россия ҳужумлари туфайли Украина энергетика инфратузилмаси жиддий зарар кўрган бир шароитда, Венгриянинг бу позицияси ЕИ ичидаги ихтилофларни янада кучайтирмоқда.

Араб давлатлари АҚШ элчиси баёнотини қоралади

Ислом ҳамкорлик ташкилоти, Араб Лигаси, Форс кўрфази ҳамкорлик кенгаши ва жами 14 араб мамлакатлари АҚШнинг Исроилдаги элчиси Майк Ҳаккабининг баёнотларини кескин қоралади. Ҳаккаби интервьюда Исроил араб ҳудудлари, жумладан Ғарбий соҳил устидан назорат ўрнатиши мумкинлигини айтган эди. Қўшма баёнотда бу фикрлар халқаро ҳуқуқ ва БМТ Низомига зид экани таъкидланди.

Давлатлар бу сўзлар минтақадаги кескинликни кучайтириши ва икки давлатли ечим бўйича саъй-ҳаракатларга путур етказишини билдирди. Улар 1967 йил чегаралари асосида мустақил Фаластин давлати тузиш ғоясини қўллаб-қувватлашини яна бир бор тасдиқлаб, Вашингтондан вазиятга ойдинлик киритишни сўради.

Теҳронда талабалар намойиши қайта авж олди

Эрон пойтахтидаги университетларда ҳукуматга қарши намойишлар давом этмоқда. Теҳрондаги олий ўқув юртларида олинган видеоларда талабалар “би шараф” (“шарманда”) деб шиорлар айтгани ва ҳукумат тарафдорлари билан тўқнашувлар юз бергани кўринган.

Айни пайтда АҚШ минтақада ҳарбий ҳозирликни оширмоқда ва президент Дональд Трамп музокаралар муваффақиятсиз якунланса, чекланган зарбалар эҳтимолини истисно қилмаган. Эрон президенти Масъуд Пезешкиён мамлакат ташқи босимга бош эгмаслигини таъкидлади. Минтақадаги хавфсизлик вазияти ёмонлашгани боис бир қатор давлатлар ўз фуқароларига Эронни тарк этишни тавсия қилган.

Брюссель: тарифлар оширилмаслиги керак

Европа комиссияси АҚШдан ўтган йил тузилган савдо келишувига амал қилишни талаб қилди. Олий суд Дональд Трампнинг глобал тарифларини бекор қилганидан сўнг, президент вақтинча 10 фоизлик, кейин эса 15 фоизлик умумий бож жорий этган эди. Брюссель Вашингтондан кейинги қадамлар бўйича “тўлиқ аниқлик” сўради.

Комиссия баёнотида ЕИ маҳсулотлари учун келишилган 15 фоиздан ортиқ тариф қўлланмаслиги шарт экани таъкидланди. Брюссельга кўра, ноаниқ ва ўзгарувчан божлар трансатлантик савдога путур етказади ва глобал бозорларда ишончни сусайтиради.

Гренландия Трампнинг “касалхона кема” ғоясини рад этди

Гренландия бош вазири Йенс-Фредерик Нильсен АҚШ президенти Дональд Трамп таклиф қилган касалхона кемасини юбориш ғоясига “йўқ, раҳмат” деб жавоб берди. Маълумки, Трамп Луизиана губернатори Жефф Ландри билан бирга Гренландияга тиббий кема жўнатиш устида ишлаётганини айтган эди. Нильсен эса мамлакатда фуқаролар учун бепул давлат соғлиқни сақлаш тизими мавжудлигини таъкидлади.

Шу билан бирга, у Гренландия мулоқот ва ҳамкорликка очиқлигини билдириб, Вашингтонни ижтимоий тармоқлардаги баёнотлар ўрнига тўғридан-тўғри музокараларга чақирди. Кейинги ойларда Трампнинг Арктика ҳудуди ҳақидаги баёнотлари НАТО иттифоқчилари ўртасида кескинликка сабаб бўлган эди.

Мусулмон Зиё, ЎзА