Бугунги кунда мутахассислар соғлом овқатланишда қиммат ва ноодатий маҳсулотлар эмас, кундалик ва табиий озиқ-овқатларга эътибор қаратишни тавсия этмоқда. Хусусан, мавсумий полиз ва мевалар организм учун энг фойдали ҳисобланади.

Шифокорлар карам, сабзи, пиёз ва кўкатлар иммунитетни мустаҳкамлаши, олма ва анор каби мевалар эса организмни витаминлар билан таъминлашини таъкидлайди. Сут маҳсулотлари – қатиқ, айрон ва йогурт ичак фаолиятини яхшилайди ҳамда овқат ҳазм қилишни нормаллаштиради.

Мутахассислар ҳафтасига камида бир-икки марта балиқ истеъмол қилиш юрак-қон томир тизими учун фойдали эканлигини билдиради. Тухум ва донли маҳсулотлар эса танани оқсил билан таъминлаб, узоқ вақт тўйимлилик ҳиссини беради.

Шу билан бирга, шакарли ичимликлар, фаст-фудлар ва ортиқча қовурилган маҳсулотларни камайтириш тавсия этилади. Кун давомида етарли миқдорда сув ичиш эса соғлом овқатланишнинг ажралмас қисмидир.

Мутахассисларнинг фикрича, ҳозирги кунда соғлом турмуш тарзи учун энг муҳим қоида – меъёр, табиийлик ва барқарорликдир.

Бийбисара Жартибаева,

Бердақ номидаги ҚДУнинг 2-курс магистранти

Қорақалпоғистон ахборот агентлиги