Búgingi kúnde qánigeler salamat awqatlanıwda qımbat hám ádettegidey emes ónimler emes, kúndelikli hám tábiyǵıy azıq-awqatlarǵa itibar qaratıwdı usınıs etpekte. Atap aytqanda, máwsimlik palız hám miyweler organizm ushın eń paydalı bolıp esaplanadı.
Shıpakerler kapusta, geshir, piyaz hám kók shópler immunitetti bekkemleytuǵının, alma hám anar sıyaqlı miyweler bolsa organizmdi vitaminler menen támiyinleytuǵının atap ótedi. Sút ónimleri – qatıq, ayran hám yogurt ishek jumısların jaqsılaydı hám de as sińiriwdi normallastıradı.
Qánigeler háptesine keminde bir-eki márte balıq jew júrek-qan tamır sisteması ushın paydalı ekenligin bildiredi. Máyek hám dánli ónimler bolsa, deneni belok penen támiyinlep, uzaq waqıt toyımlıq sezimin beredi.
Sonıń menen birge, qumshekerli ishimlikler, fast-fudlar hám artıqsha quwırılǵan ónimlerdi azaytıw usınıs etiledi. Kún dawamında jeterli muǵdarda suw ishiw bolsa salamat awqatlanıwdıń ajıralmas bólegi bolıp esaplanadı.
Qánigelerdiń pikirinshe, házirgi kúnde salamat turmıs tárizi ushın eń áhmiyetli qaǵıyda – norma, tábiyǵıylıq hám turaqlılıq bolıp esaplanadı.

Biybisara Jartıbaeva,
Berdaq atındaǵı QMUdıń 2-kurs magistrantı
Qaraqalpaqstan xabar agentligi.