Ҳукуматнинг 2026 йил 29 январдаги қарори билан “Ижтимоий реестрни юритиш тартиби тўғрисида”ги низом тасдиқланди.

Унга кўра, ариза берувчи оиласини Реестрга киритиш учун давлат хизматлари маркази, ваколатли органга борган ҳолда ёки ижтимоий ходим орқали мурожаат қилади.

Шунингдек, “ЯМИҲ” АТ, ЯИДХП ёки “Ижтимоий карта” мобил иловаси орқали мустақил равишда ариза бериш имкони ҳам яратилган.

Таъкидлаш жоизки, ҳар бир оила 1 ойда фақат 1 марта ариза топшира олади.

Оиланинг ижтимоий-иқтисодий ҳолати дастлабки баҳолашдан ўтказилади.

Баҳолаш натижаси бўйича ариза берувчининг оиласини “давлат таъминотидаги оила” ва “камбағал оила” деб топишни рад этиш учун асослар аниқланмагандагина ариза ижтимоий ходимнинг шахсий кабинетига саволнома тўлдириш учун юборилади.

Ариза берувчи томонидан тасдиқланган саволнома ахборот модулида автоматик равишда “маҳалла еттилиги”га йўналтирилади.

Хулоса “маҳалла еттилиги” томонидан тасдиқлангандан сўнг “ЯМИҲ” АТ 3 иш куни ичида оиланинг ижтимоий-иқтисодий ҳолатини якуний баҳолашдан ўтказади.

Оиланинг ҳар бир аъзосига тўғри келадиган 1 ойлик жами ўртача даромад охирги 3 ой учун ҳисоблаб чиқилган барча оила аъзоларининг даромади суммасини оила таркибига киритиладиган оила аъзолари сонига ва 3 га бўлиш орқали аниқланади.

Реестрга оилалар “давлат таъминотидаги оила”, “камбағал оила” ва “камбағаллик чегарасидаги оила” тоифаларига ажратилган ҳолда киритилади.

Оилалар улар Реестрга киритилган кундан бошлаб қуйидаги муддатларда оила аъзолари иштирокида саволнома қайта тўлдирилади:

“давлат таъминотидаги оила” – ҳар 12 ойда;

“камбағал оила” – ҳар 6 ойда.

Мазкур тизим орқали аҳолига янада қулайлик яратиш мақсад килинган.

Шербек Исломов тайёрлади, ЎзА