Сўнгги йилларда юртимизда халқимизнинг тинч-осойишта ва фаровон ҳаёт кечириши учун барча қулай шароитлар яратиб берилмоқда. Айниқса, қишлоқ-ҳудудларимизда яшовчи аҳолининг ҳамжиҳатлигини таъминлашда кўча бийларининг бажараётган хизматлари алоҳида. Улар кўчаларимизни кўкаламзорлаштириш, ободонлаштириш ва тўй-маросимларни ихчам ва исрофгарчиликсиз ўтказишда катта ишларни бажариб, уларнинг қилган бу ишлари республикамиз ҳукумати томонидан муносиб тарзда баҳоланиб келинмоқда.

Республикамизнинг бошқа ҳудудларида бўлгани каби, Чимбой туманида қишлоқ-ҳудудлар ҳаётида фаоллик ва масъулият билан иш олиб бораётган кўча оқсоқоллари ўртасида ўтказилган «Энг намунали кўча оқсоқоли» танловининг туман босқичи ғолибларини тақдирлашга бағишланган тантанали тадбир бўлиб ўтди.

Тадбирда Қорақалпоғистон Республикаси Жўқорғи Кенгесининг қўмита раиси Ш.Отемисов, туман ҳокимининг ўринбосари А.Утемисов, тегишли соҳа мутасаддилари ва маҳалла оқсоқоллари иштирок этди.

Тантанали маросимда маҳаллаларда тинчлик ва тотувликни таъминлаш, халқ билан яқин ҳамкорликда ишлаш, ижтимоий муаммоларни ҳал этишда фаоллик кўрсатиб келаётган кўча оқсоқолларининг қилаётган ишлари алоҳида таъкидланди.

Тадбирда танловнинг туман босқичида биринчи, иккинчи ва учинчи ўринларни эгаллаган маҳалла оқсоқолларига 5 миллион сўмдан, 22 та маҳалла оқсоқолига 1 миллион сўмдан пул мукофоти топширилди.

Адилбай Оразов,

Қорақалпоғистон ахборот агентлиги шарҳловчиси