Sońǵı jılları elimizde xalqımızdıń tınısh-tatıw hám abadan turmısta jasawı ushın barlıq qolaylı sharayatlar jaratılıp berilmekte. Ásirese, awıl-aymaqlarımızda jasawshı xalıqtıń awızbirshiligin támiyinlewde kóshe biyleriniń atqarıp atırǵan xızmetleri ayrıqsha. Olar kóshelerimizdi kóklemzarlastırıw, abadanlastırıw hám toy-merekelerdi ıqsham hám ısırapgershiliksiz ótkeriwde úlken jumıslardı atqarıp, olardıń islegen bul jumısları respublikamız húkimeti tárepinen ılayıqlı túrde bahalanıp kelinbekte.
Respublikamızdıń basqa aymaqlarında bolǵanı sıyaqlı, Shımbay rayonında awıl-aymaqlardıń turmısında belsendilik hám juwapkershilik penen jumıs alıp barıp atırǵan kóshe biyleri arasında ótkerilgen “Eń úlgili kóshe biyi” tańlawınıń rayonlıq basqıshı jeńimpazların sıylıqlawǵa baǵıshlanǵan saltanatlı ilaj bolıp ótti.
Ilajda Qaraqalpaqstan Respublikası Joqarǵı Keńesiniń komitet baslıǵı Sh.Ótemisov, rayon hákiminiń orınbasarı A.Utemisov, tiyisli taraw juwapkerleri qatnastı.
Saltanatlı máresimde máhállelerde tınıshlıq hám tatıwlıqtı támiyinlew, xalıq penen tıǵız birge islesiwde islew, sociallıq mashqalalardı sheshiwde belsendilik kórsetip kiyatırǵan kóshe biyleriniń islep atırǵan jumısları ayrıqsha atap ótildi.
Ilajda tańlawdıń rayonlıq basqıshında birinshi, ekinshi hám úshinshi orınlardı iyelegen kóshe biylerine 5 million sumnan, 22 máhálleniń kóshe biyi 1 million sum aqsha menen sıylıqlandı.

Adilbay Orazov,
Qaraqalpaqstan xabar agentligi sholıwshısı