Келаётган ёзда Америка Қўшма Штатларида бўлиб ўтадиган футбол бўйича Жаҳон чемпионатини бойкот қилиш ғояси Гренландия бўйича тортишув асносида Европада қизғин муҳокама мавзусига айланди, деб ёзган “Economist” нашри.

2026 йилги мундиалда биринчи марта 48 жамоа иштирок этади ва илк бор мусобақа уч мамлакат – АҚШ, Мексика ва Канадада ўтказилади. Турнир 11 июнь-19 июль кунларига белгиланган.

2028 йил Ёзги Олимпия ўйинларига эса Лос-Анжелес мезбонлик қилади.

– Брюсселдаги кайфият ҳозир, Гренландиядаги вазиятни ҳисобга олган ҳолда, жуда тушкун, – дея таъкидлаган мақола муаллифи. – Жаҳон чемпионатини бойкот қилиш ҳақида гап-сўзлар бор… Бу АҚШ томонидан 1980 йил бўлиб ўтган Москва Олимпиадаси бойкот қилинганини эслатувчи ҳолат.

Шунингдек, европаликлар Қўшма Штатларга “жавоб беришга қарор қилса”, вазият янада ёмонлашиши мумкинлиги ҳам таъкидланган.

Аввалроқ, Президент Дональд Трамп НАТО Бош котиби Марк Рюттега қўнғироқ қилиб, у билан Гренландия масаласини муҳокама қилган.

Шунингдек, Давосда Гренландия масаласи бўйича турли томонлар билан учрашув ўтказишга рози бўлганини айтганди.

Гренландия Дания Қироллигининг бир қисми, бироқ Америка етакчиси орол Қўшма Штатлар таркибига кириши кераклигини бир неча бор таъкидлаган. Дания ва Гренландия расмийлари Вашингтоннинг оролни эгаллаш фикридан қайтаришга уриниб, ҳудудий яхлитлик тамойилига ҳурмат кўрсатилиши лозимлигини таъкидлаб келади.

С.Раҳимов, ЎзА