Kelesi jazda Amerika Qurama Shtatlarında bolıp ótetuǵın futbol boyınsha jáhán chempionatın boykot etiw ideyası Grenlandiya boyınsha tartıs waqtında Evropada qızǵın dodalaw temasına aylandı, dep jazadı “Economist” basılımı.
2026-jılǵı mundialda birinshi márte 48 komanda qatnasadı hám birinshi márte jarıs úsh mámleket – AQSh, Meksika hám Kanadada ótkeriledi. Turnir 11-iyun-19-iyul kúnlerine belgilengen.
2028-jılǵı Jazǵı Olimpiada oyınlarına bolsa Los-Anjeles basshılıq etedi.
– Bryusseldegi keypiyat házir, Grenlandiyadaǵı jaǵdaydı esapqa alǵanda, oǵada tómen, – dep atap ótken maqala avtorı. – Jáhán chempionatın boykot etiw haqqında gáp-sózler bar… Bul AQSh tárepinen 1980-jili boykot etilgen Moskva Olimpiadasın esletiwshi jaǵday.
Sonday-aq, evropalılar Qurama Shtatlarǵa “juwap beriwge qarar etse”, jaǵday jáne de jamanlasıwı múmkin ekeni de atap ótilgen.
Aldınıraq, Prezident Donald Tramp NATO Bas xatkeri Mark Ryuttege qońıraw etip, onıń menen Grenlandiya máselesin dodalaǵan.
Sonday-aq, Davosta Grenlandiya máselesi boyınsha túrli tárepler menen ushırasıw ótkeriwge kelisim bergenin aytqan edi.
Grenlandiya Daniya Patshalıǵınıń bir bólegi, biraq Amerika jetekshisi ataw AQSh quramına kiriwi kerek ekenligin bir neshe márte atap ótken. Daniya hám Grenlandiya rásmiyleri Vashingtonnıń atawdı iyelew pikirinen qaytarıwǵa urınıp, aymaqlıq pútinlik principine húrmet kórsetiliwi kerek ekenligin atap kelmekte.

S.Rahimov, ÓzA