DW хабарига кўра, Владимир Путин АҚШда музлатилган Россия активларидан 1 млрд доллар “Тинчлик кенгаши”га топширилиши мумкинлигини маълум қилган.

Путиннинг Россия Федерацияси Хавфсизлик кенгаши йиғилишида айтишича, қолган маблағлар “Россия ва Украина ўртасида тинчлик шартномаси имзоланганидан кейин урушда зарар кўрган ҳудудларни тиклашда” ишлатилиши мумкин. Бироқ, қайси ҳудудлар, Украина   назоратидагими ёки Москва эгаллаган ҳудудларми, бунга аниқлик киритилмаган.

Шунингдек, Путин Россия ҳозирча АҚШ таклифига биноан “Тинчлик кенгаши”га аъзо бўлишга тайёрми ёки йўқми, бунга ҳам тўхталмаган. “Тинчлик кенгаши” номи билан аталувчи бу ташкилот, Ғазо секторида тинчликни таъминлаш бўйича тузилганлиги айтилди. Бироқ кузатувчилар кенгашнинг ваколатлари анча кенг бўлиши мумкинлигини билдиришмоқда, шу боис у БМТнинг рақобатчисига айланиши ҳам мумкин.

“Тинчлик кенгаши”нинг устави бугун Давосда бўлиб ўтаётган Жаҳон иқтисодий форумида имзоланиши кутилмоқда. Кенгаш раиси – Дональд Трамп. Унинг ижроия қўмитасига АҚШ давлат котиби Марко Рубио, президентнинг қариндоши Жаред Кушнер ва собиқ Британия бош вазири Тони Блэр кириши маълум қилинган. Германия ва Россия раҳбарларига ҳам кенгашда иштирок этиш таклифлари юборилган. Лекин, Германия ҳукуматиТрампнинг “Тинчлик кенгаши”га шубҳа билан қарамоқда. Масалан, вице-канцлер Ларс Клингбайль  “Қўшимча халқаро институтларга эҳтиёж йўқ. БМТ бор, янги ташкилотлар яратиш эмас, балки борини ривожлантириш керак”, – деган.

Владимир Путин ҳам Россия Хавфсизлик кенгаши доимий аъзолари билан ўтказилган йиғилишда, бу масала бўйича Россия Ташқи ишлар вазирлигига келиб тушган ҳужжатларни ўрганиш ва стратегик ҳамкорлар билан маслаҳатлашиш топширилганини айтиб ўтди. “Фақат шундан сўнг биз АҚШ томонидан берилган таклифга жавоб берамиз”,- деган у. Россиянинг бу позицияси бироз тушунарсиз туюлиши мумкин. Масалан,  Россия музлатилган активларидан 1 млрд долларни “Тинчлик кенгаши”га беришга тайёр эканини айтяпти, лекин аъзо бўлишга шошилмаяпти. Яъни, бу ҳаракатларда “Россия тинчлик учун маблағ ажрата олади, Америка ташаббусларини ҳурмат қилади”, деган маънони уқиш мумкин, деб талқин қилишмоқда мутахассислар.

Кенжа Бекжонов, Улуғбек Тўхтаев (видео), ЎзА