DW xabarına bola, Vladimir Putin AQShta muzlatılǵan Rossiya aktivlerinen 1 mlrd dollar “Tınıshlıq keńesi”ne tapsırılıwı múmkin ekenligin málim etken.
Putin Rossiya Federaciyası Qáwipsizlik keńesi májilisinde aytıwınsha, qalǵan qarjılar “Rossiya hám Ukraina arasında tınıshlıq shártnamasına qol qoyılǵannan keyin urısta zıyan kórgen aymaqlardı tiklewge” jumsalıwı múmkin. Biraq, qaysı aymaqlar, Ukraina qadaǵalawındaǵı ma yamasa Moskva iyelegen aymaqlar ma, oǵan anıqlıq kirgizilmegen.
Sonday-aq, Putin Rossiya házirshe AQShtıń usınısı boyınsha “Tınıshlıq keńesi”ne aǵza bolıwǵa tayar yamasa tayar emes ekenine de toqtap ótpegen. “Tınıshlıq keńesi” atı menen atalatuǵın bul shólkem, Gaza sektorında tınıshlıqtı támiyinlew boyınsha dúzilgeni aytıldı. Biraq baqlawshılar keńestiń wákillikleri biraz keń bolıwı múmkin ekenin, sol sebepli ol BMShtıń básekishisine aylanıwı da múmkin ekenin bildirmekte.
“Tınıshlıq keńesi”niń ustavına búgin Davosta bolıp ótip atırǵan Jáhán ekonomikalıq forumında qol qoyılıwı kútilmekte. Keńes baslıǵı – Donald Tramp. Onıń atqarıw komitetine AQSh mámleketlik xatkeri Marko Rubio, prezidenttiń tuwısqanı Jared Kushner hám burınǵı Ullı Britaniya bas ministri Toni Bler kiretuǵını málim etilgen. Germaniya hám Rossiya basshılarına da keńeste qatnasıw usınısları jiberilgen. Biraq, Germaniya húkimeti Tramptıń “Tınıshlıq keńesi”ne gúman menen qaramaqta. Máselen, vice-kancler Lars Klingbayl “Qosımsha xalıqaralıq institutlarǵa zárúrlik joq. BMSh bar, jańa shólkemler jaratıw emes, al barların rawajlandırıw kerek”, – degen.
Vladimir Putin de Rossiya Qáwipsizlik keńesiniń turaqlı aǵzaları menen ótkerilgen májiliste, bul másele boyınsha Rossiya Sırtqı isler ministrligine kelip túsken hújjetlerdi úyreniw hám strategiyalıq sherikler menen másláhátlesiw tapsırılǵanın aytıp ótti. “Tek sonnan keyin biz AQSh tárepinen berilgen usınısqa juwap beremiz”,- degen ol. Rossiyanıń bul poziciyası biraz túsiniksiz bolıp tuyılıwı múmkin. Máselen, Rossiya muzlatılǵan aktivlerinen 1 mlrd dollardı “Tınıshlıq keńesi”ne beriwge tayar ekenin aytıp atır, biraq aǵza bolıwǵa asıqpay atır. Yaǵnıy, bul háreketlerde “Rossiya tınıshlıq ushın qarjı ajırata aladı, Amerika baslamaların húrmet etedi”, degen mánisti ańlaw múmkin, dep talqılamaqta qánigeler.

Kenja Bekjonov, Uluǵbek Twxtaev (video), ÓzA