Кредит ва тўлов ташкилотлари, шунингдек тўлов тизими операторлари томонидан жисмоний шахсларга масофадан молиявий хизматлар кўрсатишда ахборот ҳамда киберхавфсизликни таъминлашга қаратилган янги талаблар жорий этилди.

Унга кўра, мобил иловада рўйхатдан ўтган фойдаланувчи аккаунтига фақат ўзи ёки яқин қариндошларига тегишли бўлган банк ҳисобварағи, банк картаси ва электрон ҳамёнларни бириктириш ҳамда ушбу аккаунт орқали P2P ўтказмаларини амалга ошириш мумкин.

Шунингдек, фойдаланувчининг телефон рақами ва ЖШШИРи мослиги текширилади. Агар мослик аниқланмаса, мобил иловада рўйхатдан ўтиш ва банк картасини бириктиришга йўл қўйилмайди.

Кредит ва тўлов ташкилотлари фойдаланувчиларни биометрик идентификациядан ўтказишда ҳаётийлик факторларини аниқлаши шарт. Яъни, расм орқали идентификация қилишга рухсат берилмайди.

Бундан ташқари, телефонга юборилган бир марталик СМС-код 3 марта нотўғри киритилса, фойдаланувчининг мобил иловадаги ҳаракатлари 15 дақиқага вақтинча чекланади.

Мобил иловадаги аккаунтга бошқа қурилмадан кириш ёки паролни қайта тиклаш ҳолатида, аккаунтга боғланган барча банк карталари автоматик тарзда мобил иловадан чиқариб юборилади ҳамда ушбу қурилмадаги молиявий операциялар тарихи ўчирилади.

Қайд этилишича, банк карталарини қайтадан бириктириш мажбурий биометрик идентификациядан ўтган ҳолда амалга оширилади.

Аввалроқ онлайн кредит фирибгарлиги қурбонларидан қарз ундириш тўхтатилиши хабар қилинганди.