Kredit hám tólem shólkemleri, sonday-aq, tólem sisteması operatorları tárepinen fizikalıq táreplerge aralıqtan qarjı xızmetlerin kórsetiwde málimleme hám kiberqáwipsizlikti támiyinlewge qaratılǵan jańa talaplar engizildi.
Oǵan bola, mobil qosımshada dizimnen ótken paydalanıwshınıń akkauntına tek ǵana ózi yamasa jaqın tuwısqanlarına tiyisli bolǵan bank esabı, bank kartası hám elektron hámiyanlardı biriktiriw hám usı akkaunt arqalı P2P ótkermelerdi ámelge asırıw múmkin.
Sonday-aq, paydalanıwshınıń telefon nomeri hám JShShIR sáykesligi tekseriledi. Eger sáykeslik anıqlanbasa, mobil qosımshada dizimnen ótiw hám bank kartasın biriktiriwge jol qoyılmaydı.
Kredit hám tólem shólkemleri paydalanıwshılardı biometrikalıq identifikaciyalawdan ótkeriwde turmıslıq faktorlardı anıqlawı shárt. Yaǵnıy, súwret arqalı identifikaciyalawǵa ruqsat berilmeydi.
Bunnan tısqarı, telefonǵa jiberilgen bir mártelik SMS-kod 3 márte nadurıs kirgizilse, paydalanıwshınıń mobil qosımshadaǵı háreketleri 15 minutqa waqtınsha sheklenedi.
Mobil qosımshadaǵı esapqa basqa qurılmadan kiriw yamasa paroldi qayta tiklew jaǵdayında, esapqa baylanıslı barlıq bank kartaları avtomatikalıq túrde mobil qosımshadan shıǵarıp taslanadı hám usı qurılmadaǵı finanslıq operaciyalar tariyxı óshiriledi.
Atap ótiliwinshe, bank kartaların qayta biriktiriw májbúriy biometrikalıq identifikaciyadan ótken halda ámelge asırıladı.
Aldınıraq onlayn kredit aldawshılıǵı qurbanlarınan qarız óndiriw toqtatılatuǵını xabar etilgen edi.

Qaraqalpaqstan xabar agentligi