АҚШ Президенти Дональд Трамп Франция Президенти Эммануэль Макроннинг Ғазо масаласи бўйича «Тинчлик кенгаши»га қўшилиш таклифини рад этиши ортидан кескин баёнот берди. Трамп Макрон кенгашга қўшилмаса, француз вино ва шампанларига 200 фоизлик бож жорий қилиниши таҳдидини билдирди. Бу ҳақда «Bloomberg» хабар тарқатган. Трамп Оқ уйда журналистларга, жумладан, шундай деган: Ҳеч ким Макронни кенгашда кўришни хоҳламайди, чунки у тез орада лавозимини тарк этади. Франция виноларига 200 фоиз солиқ солинади ва у барибир бизга қўшилади.

Америка етакчисининг мазкур қарори Макрон унинг ташаббусини қабул қилмаслиги хусусида хабар тарқалиши муносабати билан қабул қилинган. Трамп Франция раҳбарининг халқаро сиёсатдаги таъсири пасайгани, савдо воситалари орқали унга босим ўтказиш мумкинлигини ҳам очиқ айтган.

Дарвоқе, президентлик муддати келаси йил якунига етадиган Макрон навбатдаги сайловда қатнашмаслигини эълон қилган.

Франция ҳукумати Трамп таклиф қилаётган «Тинчлик кенгаши» фақат Ғазо масаласи билан чекланмаслиги ва БМТ институционал тамойилига зид келиши мумкинлигидан хавотир билдирган. Макронга яқин манбалар фикрича, Париж учун БМТ доирасидаги халқаро ҳуқуқий механизм муҳокама қилинмайдиган қадрият ҳисобланади.

Кенгашнинг бошқа танқидчилари Трамп қадамини БМТга муқобил ёки рақиб тузилма яратишга уриниш сифатида баҳоламоқда. Улар айни ташаббус глобал бошқарув тизимида янги зиддият ва кескинлик келтириб чиқариши мумкинлигига урғу бермоқда.

Ф.Яхшибоева, ЎзА